Arepentimento ta haci hende liber, ta core cu depresion, ta evita malesa mental, ta trece pordon, hasta por evita un atake di curason y mas cu tur cos ta drecha nos relacion cu Dios.
Awendia depresion ta hopi conoci, pasobra hopi hende a aleha for di Dios no tin temor di Dios y ta biba manera nan kier, cu e consecuencia cu nan ta cay den depresion.
Tin depresion cu por wordo causa, door cu un persona a perde trabao of a perde un ser keri, tur esaki nos ta reconoce, cu no ta un situacion cu bo a spera y cu diripiente a aparece den bo bida.
Pero tambe tin depresion causa door di capricho, deseo impuro, malcriansa, mal custumber y cu ta yega un caminda, cu bo no por logra locual cu bo kier, e ora ey e enemigo ta gara bo mente y hinca bo den un skina di depresion.
Hopi ta cuminsa cana caminda di dokter, cual nos no tin nada contra esey, pasobra di tur manera bo mester di ayudo.
Pero tambe tin hopi cu no sa con haci y cu ta cuminsa aparta nan mes for di hende, nan ta cuminsa bebe di mas, of huma, of droga, marca nan curpa y cada cos nan ta cla pa discuti y hasta cay den violencia.
Hopi hende no sa cu por ehempel ora un homber/ muhe ta infiel bo ta añadi den bo bida varios mal spirito cu ta causa depresion, un di nan ta e spirito di mentira. (Pasobra infidelidad ta un pakete completo).
Simplemente bo consenshi, no ta permiti bo reacciona normal, bo ta kere cu ta divorcio ta e solucion, bo ta kere cu si bo bay for di cas ta mihor, y rekeri na violencia domestico como shortcut pa salida for di matrimonio.
Awel den ningun caso , cos lo drecha pa bo, mientras cu bo no arepenti, pasobra arepentimento ta haci hende su curason liber y no tin nada mas bunita ora bo arepenti y pordona, of pidi e persona cu bo a haci daño pa pordona bo, pasobra e ora ey bo tin paz tanto cu Dios como cu hende.
Bo por kere of pensa cu tur cos lo sali bon, pero aunke tur bo amigo (a ) ta aplaudi bo, bo tin Dios y su Palabra cu no ta aplaudi, bo hecho, pero cu ta yama bo na arepentimiento.
Ora rey David a comete su hecho detestabel cu Betsabe , e a yega na confesion y arepentimiento dilanti di Dios ( Salmo 51 vers 1 -10) David ta arepenti y asina ricibi pordon di Dios, David no a tira e falta riba e muher Betsabe, ni tampoco usa excuus, pero a para manera homber y arepenti y drecha su relacion cu Dios.
Arepentimento di berdad, den tur caso, ta core cu depresion y ta trece libertad den nos curason y nos mente.
Sinceramente,
Pastor Marcel Balootje.
