Pastoor Jairo Maduro ta interna den hospital, asina e mes a confirma nos drumi den e seccion di cardiologia na Dr. Horacio E. Oduber Hospital. El a haya señal negativo pa cu funcionamento di su curason. A drenta hospital diabierna y a intern’e pa observacion.
Parce pastoor Jairo Maduro ta poniendo poco ambiente tambe interna den hospital. Ademas di ta straight cu su mensahenan, e ta gusta poco ambiente di locura tambe. Cu e situacion di salud cu a presenta, ta spera cu e no afecta su presentacion final pa Carnaval 70.
E ta mustra di ta bayendo bon te e momentonan aki y ta pasando un proceso di monitoreo. E ta pendiente di algun test mas cu e mester haci.
Riba nos pregunta di kico por ta e motibo cu diripiente el a hay’e confronta cu presion halto cu a conduci na problema cu su curason, el a contesta “Traha hopi!!! Sin descanso”.
Nos ta desea Pastoor Jairo Maduro pronto recuperacion. Pueblo ta pendiente p’e pa su participacion den e final di Festival di Roadmarch y tambe den e paradanan di carnaval.
Tocante Pastoor Jairo Maduro
Jairo Maduro a studia na Universidad Pontificia Salesiana y ta pertenece na e Diocesis di Willemstad, bou cual Aruba tambe ta pertenece. Den henter su carera sacerdotal, el a traha tanto na Aruba como den exterior. El a ordena na aña 2004.
Su prome cinco añanan como sacerdote, el a traha na Venezuela, na e ordinariato militar, como formado di seminario y tambe a traha como capelan di Comandancia Guardia Nacional y tambe na otro unidadnan militar. Despues di esey, Venezuela a drenta den un situacion basta fastioso y el a bolbe su pais Aruba, mirando cu e ta pertenece na e obispado di Willemstad.
E prome parokia cu pastoor Jairo Maduro a traha na dje tabata Parokia Cristo Rey na Brazil. Eynan el a cuminsa na 2008 y despues di 8 aña el a bira pastoor di Parokia Inmaculada Concepcion na Santa Cruz.
