Mentira ta un circulo vicioso, cual hende mester sali fo’i dje. Otro nomber pa mentira ta gañamento.
Hopi hende no kier pa bo bisa nan ta gaña e ta zona como un faltamento di respet, depende e posicion di e persona, pero mentira of gañamento ta enemigo di tur hende.
No tin ningun beneficio den gañamento. Ta un cortina temporal, cu hende ta uza pa domina of pa sconde cos. specialmente hende orguyoso y arogante ta gusta saca mentira, pa demostra cu nan tin tur cos bao di control y esey no ta e berdad.
Hesus a bisa cu mentira ta bin for di e tata di mentira kende ta satanas. Esey ta nifica cu ora un persona ta gaña e ta dunando cooperacion na satanas. (Juan 8:44)
Bo por traha hopi duro pa bo yega na un cas y pa motibo di mentira bo ta perde tur cos, pasobra mentira ta daña bo relacion cu Dios y cu hende.
Kico e enemigo ta haci cu bo? Awel pa via di mentira ta hinca bo den un circulo pa bo sigui ripiti, sigui sconde, sigui discuti, sigui priminti, sigui culpa otro hende, sigui halsa bo mes, pa despues bo cay den bo mes trampa.
Como mayor trata di tene bo bida liber di mentira, bo cas liber di mentira y bo yiunan liber di mentira. Un mucha cu ta gaña ta cera porta pa su mes tur caminda.
Ta prohibi pa siña bo yiu gaña na bo fabor, sconde cos pa bo, haci manera nan no a mira, haci huramento falso pa bo.
Asina cu mentira podera di un cas, ta dividi e famia, e paz no t’ey, a kibra e base di confiansa, pasobra mentira ta un spirito y solamente cu arepentimento y pordon bo por libra di dje.
Mentira tin asina tanto poder cu e por domina henter bo bida, trece plannan falso den bo mente, haci bo ciego y tambe guia con pa elimina esunnan cu no ta di acuerdo cu bo.
Mentira tambe por ta causa di malesa mental.
Mentira a pone rey Saul perde su reinado.
Cu mentira Jacob a horta bendicion di Esau.
Cu mentira Jezabel a kita e tereno di Nabot.
Pa motibo di mentira Ananias cu Safira a muri.
Bijbel ta bisa cla cu ningun mentiroso lo no hereda e reino di Dios.
Mentira of gañamento ta pica.
Y esun cu ta sconde su pica (gaña) lo no prospera.
Mentira a yega di causa guera grandi caminda miles a perde nan bida.
Mentira tin hopi pais den decadencia, pasobra no tin crecemento caminda tin gañamento.
Tur dia tin pleito, violencia, divorcio, perdida di trabao pa motibo di mentira.
Un cos cu ta stroba hopi hoben di alcansa nan proposito den bida ta ora nan ta laga mentira domina.
Laga nos pidi Dios pa den nomber di Cristo Hesus libera tur hogar y famia di mentira, p’asina berdad por prevalece, a halsa Cristo halsa y bendicion di Dios por reina.
