E situacion ta critico. Esey nos tur sa. Malesa ta ataca tur hende, necesidad ta bira dia pa dia mas grandi. Pero den tur esaki, e responsabilidad di mayor ta keda un prioridad. Pasobra locual bo laga bay fo’i man awe, mañan bo ta haci dolor pa bo rescat’e.
Nos tur sa con cos ta cuminsa. Prome luga bo tende cu e mucha su orea ta duro, e ta malcria, e ta mala mucha, baldadi, rebelde, no tin cuenta, mi no por mas cu ne. Y despues tur sobra ta sali den media, cu detencion, etc.
Pero abo como mayor ta keda e ‘first responder’ pa bo yiu. Bo deber ta sagrado. Despues di Dios abo ta gobernador di bo cas, abo mester tuma autoridad den bo cas no cu violencia, ni tampoco cu palabra malo. Pero establece respet, manera e palabra di Dios ta instrui.
Ningun fundacion no por carga bo responsabilidad. Bo no a haya yiu pa gobierno encarga di dje. Pero p’abo mes dun’e amor, cariño, educacion, respet y mas cu tur cos abo como mayor ta su prome modelo. Tur locual abo como mayor hinca den bo yiu t’esey bo ta bay cosecha.
Bo mester coregi bo yiu, como mayor abo ta su instructor, cual a base di e palabra di Dios bo ta guia bo yiu pa e ta exitoso.
Ken no kier tin un yiu exitoso. Ken no kier tin un yiu integro, cu respet y cu conoce norma y balor di bida. Ken no kier tin un yiu, cu a studia y gradua pa e tin un bon trabao.
Hopi ta lubida cu ta e muchanan di awe lo ta e gobernantenan di mañan cu Dios kier. Pero con nos por tin bon gobernante mañan si awe nos ta laga e hubentud sali fo’i man. Awe nos ta permiti nos yiunan ta instrui den mal caminda di droga y tur otro mal influencia.
Nos tur sa awor cu si un mucha ta lanta tur dia mira violencia of otro tipo di maldad cerca su mayornan, tin 75% cu ora e mucha aki tin su mes hogar e lo haci mesun cos.
Igualmente mayoria di homber cu ta bati muhe tin un reis di violencia den famia of influencia pa droga y alcohol.
Nos tin di compronde cu un palo mester ta guia pa e crece bon fo’i chikito, pasobra na e momento cu e dobla e ta haci dolor pa pone stret bek. Esey ta conta pa nos hubentud tambe.
Salmo 92:12 ta bisa: “Cu e husto lo crece manera e mata di palma. Abo a wak con un mata di palma ta crece stret bay ariba y bo tabata sa cuanto beneficio por saca for di un mata di palma.”
Abo como mayor tin tur instrument den bo man. Na prome luga guia bo yiu den e caminda di Señor y abo mes como mayor permanece den e caminda di Señor p’asina bo yiu por haya e miho e ehempel cu ta sali di bo como mayor.
