Nos no mester di tin miedo pasobra nada ta imposibel pa Dios, tampoco biba bao di intimidacion di e enemigo, pasobra no tin nada mas grandi cu poder di Dios. Aunke maldad y inmoralidad ta crece cada dia lo tin abundancia di e gracia di Dios pa tur esunnan cu ta kere den Dios y ta haci su boluntad.
David a bisa: Bo ta prepara un mesa mi dilanti den presencia di mi enemigonan.
Bo ta ungi mi cabes cu zeta , mi copa ta yen te basha over.
Siguramente bondad y misericordia lo sigui mi, tur e dianan di mi bida, y lo mi biba den cas di Señor pa semper. ( Salmo 23:6).
Kere den Dios y haci su boluntad mester ta prioridad pa nos bida, pasobra e oracion di Nos Tata ta siña nos tur; Cu Bo reino bini,Cu Bo boluntad sosode na tera mescos cu den cielo.
Asina cu tin cosnan den nos bida cu no ta den boluntad di Dios, nos mester stop cu nan.
Pasobra den e cos nan ey lo no tin crecemento pa nos, pasobra hopi cos cu hende ta haci ta mustra bunita y grandi pa nan mes, pasobra nan ta busca fama y gloria pa nan mes.
Pero Dios no ta den e asunto, y ora nos ta bezig cu cosnan asina, diripiente dianan dificil lo acerca , cu nos no por drumi anochi, pasobra nos no ta den e boluntad di Dios.
Aunke maldad ta loer tur caminda , tur hende mester sa cu: Señor ta yen di gracia y compasion, Kende no ta rabia lihe, y ta grandi den misericordia.
Señor ta bon pa tur, y Su Misericordia ta riba tur Su obranan.
Tur Bo obranan ta alaba Bo O Señor y Bo santonan lo bendiciona Bo.( Salmo 145:8-10).
E diabel ta un gran mentiroso , y ta busca tur manera pa mantene hende den scuridad, uzando material, placa y sensualidad y humildad falso.
Siña mi haci Bo boluntad, pasobra Abo ta mi Dios,laga bo bon Spirito guiami, na e tera di rectitud.
( Salmo 143:10).
E boluntad di Dios, ta limpi , firme y puro, e no tin nada dobla y scondi den dje, ora nos ta biba den e boluntad di Dios, tur ora palabra di frankesa ta sali for di nos boca, duda ta aparta for di nos, nos por curasha otro tur momento, pasobra boluntad di Dios, ta yena nos cu fe den Dios pa nos por haci bon.
Caminda tin boluntad di Dios, mentira, orguyo,arogancia y amargura ta keda leu, pasobra e boluntad di Dios ta yama e presencia di Dios, y caminda e presencia di Dios ta, tin luz y caminda tin luz scuridad mester huy.
Dios ta luz, y den dje no tin nada,nada di scuridad. Si nos bisa nos ta cana den luz y nos ta odia nos ruman,nos ta gaña, pasobra ora nos ta cana den scuridad, nos no tin comunion cu Dios.
Den un curason caminda tin rabia ,odio y orguyo, tur cos ta wordo expresa den e vocabulario, pasobra e luz di Dios lo saca tur cos na claridad.
Señor ta bon y recto, p’esey E ta instrui pecadornan den e caminda. E ta guia humildenan den huicio, y E ta siña e humildenan su caminda.( Salmo 25:8).
Como mayor nos mester guia nos yiunan den e boluntad di Dios, mustra nan con laga e boluntad di Dios guia nan bida, , Dios semper ta fiel, Dios a priminti cu nunca lo E laga nos bandona y desampara.
( Deuteronomio 31:6)
