Palabra di Dios ta bisa cu si bo kere den bo curason y confesa cu bo boca cu Hesus Cristo ta Señor lo bo ta salba. Hopi hende ta tende pero nan no kier admiti, cu bo mester kere den bo curason y declara cu bo boca esey ta un declaracion publico, cu bo ta acepta cu Cristo Hesus ta nos Salbador y cu no tin nada cu por reemplasa Cristo den nos bida.
Ora nos tin Cristo Hesus den nos bida nos tin bida eterno den Dje, pasobra hopi hende ta haci wega, otro ta duna enseñansa cu bo no tin di hacie, pero nan no por duna bo ningun garantia ora bo muri na unda bo ta bay. Hopi no ta compronde e diferencia entre salbacion y religion.
Tin un parti den Bijbel caminda tin algo masha fuerte, sincero y berdad skirbi cu cada mayor mester lesa y splica nan yiunan, pasobra den tur traduccion di bijbel e por ta diferente den palabra pero e ta nifica mesun cos.
Ta trata aki di e buki di 1 Tesalonicences Capitulo 4 vers 16 -18 cual ta bisa lo siguiente: Pasobra Señor mes lo baha for di cielo cu un grito y cu bos di arcangel y cu trompet di Dios: y e mortonan den Cristo lo lanta prome y e ora ey nos cu ta na bida , y cu keda , lo wordo tuma den e nubianan hunto cu nan pa contra cu Señor den laira y asina nos lo ta semper hunto cu Señor.
Tin hende ta yam’e Binida di Señor. Un ta yam’e e rapto di Iglesia. Otro ta yam’e arebatamento. Tin hende kier discuti of debati riba e tema pa hunga sabi. Pero ningun caminda den Bijbel no ta para cu nos tin di discuti ni tampoco debati.
Tin algo cu nos tin di tene bon cuenta cu locual ta para skirbi den 1 Tesalonicenses Capitulo 4 di verso 1 te cu 18 por tuma luga di un momento pa otro. Pasobra Hesus mes a priminti esey.
Awor nos ta busca garantia den hopi cos awendia. Nos ta mara nos mes na cos nan di mundo. Nos kier percura pa nos ta rico cual ta algo temporal. Nos ta bringa pa poder, pero no tin ningun hende na mundo cu mas poder cu Dios. Nos ta busca forsa den mundo di scuridad y ocultismo, pero diabel no tin mas poder cu Dios. Nos ta daña bida di otro pa asina por drecha nos bida, y lubida cu na final tur hende tin cu duna cuenta di su mes bida.( ROM 14:12)
E palabra ta splica cla: cu e mortonan den Cristo lo lanta prome, morto den Cristo ta nifica esunnan cu a acepta Hesus Cristo como nan Señor y Salbador publicamente, cu a biba y muri cu Cristo den nan curason, nan lo wordo lanta y esunnan cu ta na bida cu tambe a haci mesun cos, lo wordo tuma den nubia. Pa asina nos lo ta pa semper cu Señor.
Esey ta e unico speransa berdadero cu nos tin ora nos acepta Hesus Cristo como Señor y Salbador, biba cu ne y ora morto yega tambe nos lo bay cu ne. Ningun otro forma di bida no ta ofrece e siguridad di salbacion. No laga ningun hende gaña bo. Si bo NO biba pa Cristo aki na mundo ta imposibel pa bo drenta cielo, pasobra ta aki na tera bo arepentimento mester tuma luga.
Awor abo conoce e situacion di bo bida, di bo curason y di bo Famia, no tarda entrega awe mes na Señor. E ta bini manera ladron den anochi.
Corda bon cu Juan 3 vers 16 y Mateo 11 vers 28 ta duna oportunidad igual na tur hende. No tin Discriminacion.
Vacuna por laga di ta obligatorio, pasobra hende por dicidi riba nan bida, Pero Cristo Hesus si ta Obligatorio pa tur esunnan cu kier ta hunto cu ne pa semper. Scoge awe.
