Si bo come un cuminda cu no a bay bon cu bo y e no kier baha for di bo stoma, pa evita dolor di stoma, bo por bebe dos cuchara di DICA pa asina alivia bo stoma. Pasobra si bo no hacie, e situacion por bira mas grave.
Awel, mescos ta ora pica drenta nos bida nos mester confesa y aparta for di pica pa nos consenshi y nos comunicacion cu Dios ta limpi, y nos curason tin pas.
Tur pica cu hende confesa, Dios ta pordona, pasobra esey ta para skirbi den 1Juan 1:9, pero ora hende no ta confesa, of no kier confesa, spiritualmente nan comunicacion cu Dios ta kibra. Pasobra bo sa cu bo a haci malo pero bo no kier drecha e asunto cu Dios.
Pero pica no solamente tin consecuencia spiritual, pero tambe pica tin consecuencia den nos salud mental, ora nos keda sin confesa, e locual cu tin den nos consenshi. Esaki ta traha riba nos mente y ta duna nos stress, depresion, y despues amargura, cual ta cos ta dificil pa ciencia medico compronde.
Y tambe tin consecuencia fisico pa nos ,un dolor di cabes, un curpa stijf, un stoma cu no ta wanta cuminda, un curpa cu dolor tur dia, y di ningun forma e dolornan aki no kier pasa, ta pone hende pensa un rato, y si bo ta realistico cu bo mes bo ta bay den oracion y Dios mes lo mustra bo kico ta pasando cu bo.
Tin masha specialista y cientifico riba e tereno di salud mental, pero solamente esunnan cu tin un relacion firme cu Dios y cu ta busca cara di Dios diariamente, por haya revelacion di Dios cu tin pica scondi den bida di hende, y por ta e causante di e malesa.
Awendia bruheria a bira moderno, y hende ta bay tras di tur sorto di bagamunderia, pero bruheria no tin ningun poder pa reconoce pica, pasobra bruheria mes ta pica, y semper nan ta bisa bo cu un hende a haci bo malo, pero nan no ta capaz pa bisa bo, cu abo tin di stop di haci malo cu hende y bo mester pordona.
Esun ta sconde su pica lo no prospera, laga esaki drenta horea di tur hende, pasobra no ta importa ken bo ta, pasobra Rey David tambe a pensa asina, pero Dios a descubri su pica y pone su cara na berguensa.
Proverbionan 28:13+14 ta para skirbi: Esun cu sconde su picanan lo no prospera, ma esun cu confesa y laga nan lo haya misericordia.
Bendiciona ta e hende cu semper tin temor, ma esun cu haci su curason duro, lo cay den calamidad.
Ora bo saca asunto di otro hende na cla, no ta nifica cu abo ta limpi sin ningun pica, pasobra dilanti di Dios tur hende tin di duna cuenta pa nan picanan. Ningun hende no ta paga pa falta di otro, ( Romanonan 14:12+13).
Awor Dios den su inmenso amor ta yama nos tur na arepentimento, pasobra nos tur ta hende y nos tur a peca .
Pero diabel tin hopi hende gaña, cu nan sa masha bon cu nan ta haci robes, pero nan ta biba den gran capricho y curason duro, cu nan no kier arepenti y sali for di maldad, scuridad y inmoralidad, pero dia pa dia bo ta nota cu nan ta hancra nan mes den tur tipo di malicia.
Si awe bo scucha Señor su bos of na e momento cu bo ta lesando aki, bo sinti cu bo tin di confesa, no lag’e pa mañan cu Dios kier, awe ta bo dia di Salbacion.
