Juan Bautista tabata predica arepentimento, pasobra solamente pa medio di arepentimento nos por drenta e reino di Dios. (Lesa Romanos Capitulo 3:23 y 1 Juan 1:9).
No ta existi un hende cu no tin pica p’esey nos tur mester arepenti.
Arepentimento ta nifica pone un stop na hacimento di maldad/pica y aparta for di pica y no hunga cu pica, no haci manera bo no sa cu ta malo bo ta haci y sigui den mesun cos.
Locual ta pasa ta cu hopi hende no ta tuma e palabra di Dios na serio pasobra Dios su misericordia ta grandi, anto nan ta kere cu nan por sigui biba den pica sin arepenti.
Arepentimento mester tuma luga den cada bida y cas, pa asina un famia fortalece nan relacion cu Dios.
Ta e unico forma pa nos por ta na paz cu Dios, ta door di reconoce nos pica y aparta for di nos pica.
Tin hopi cherchado ta cana rond, haciendo comosifuera tur cos ta OK, nan ta haci wega cu Dios, haciendo malo y sperando bon.
Si un hende ta bebe, bin cas haci bochincha, lanta mainta pidi despensa y atardi e ta bolbe bin cas bek burachi y bolbe haci bochincha, manera e no ta corda su promesa di mainta, un persona asina mester arepenti y busca Dios y drecha relacion cu su famia.
Asina tin hopi hende ta trata Dios, por ehempel nan ta infiel, nan ta pidi pordon, pero keto bay ta continua den nan infieldad.
Hende cu ta biba den pica, ta integro dilanti di nan amigo y compinchi, pero no dilanti di Dios.
Por si acaso tin hende cu por a lubida, biba den pica ta nifica, ora hende ta persisti pa haci contrario na e boluntad di Dios of ora cu hende ta sali for di proposito pa cual nan ta traha. (Genesis Capitulo 1:26, 27, 28).
Como mayor hopi biaha nos ta busca tur manera pa expresa nos mes ora cos no ta bayendo bon na cas, nos ta wak rond y lubida cu nos por arepenti y asina trece claridad den tur asunto.
Den hopi organisacion hende ta prefera pa nan kibra en bes di nan arepenti di nan pica.
Cuanto mucha ta biba sin nan mayornan, pasobra e mayornan no kier arepenti tampoco pordona.
Arepentimento no ta nifica baha cabes pa hende pero e ta nifica pidi despensa na Dios pa nos foutnan, p’asina nos por ricibi pordon di Dios.
Hende ta preocupa cu tur tipo di amistad, pa nan ta bon mira tur caminda. Pero no ta tur hende ta preocupa con nan bida ta den bista di Dios.
Hopi hende ta biba pa biba y ora algo pasa e prome nomber menciona ta esun di Dios.
Hesus ta yama nos tur na arepentimento, pasobra sin arepentimento no tin pordon di pica, tur hende mester yega na arepentimento berdadero pa drecha relacion cu Dios.
