Informacion ricibi ta indica cu no solamente e carta di Monseigneur Luis Secco pa Aruba a cay di sorpresa, pero nan no ta di acuerdo cu ne tampoco. Esaki ta motibo cu p.e. Misa di Parokia Sta Cruz ta sigui cu su servicionan. Te ora cu haya un splicacion di e situacion.
Obispado di Willemstad e siman aki a saca dos decreto. E prome tabata valido pa Corsou y Boneiro y esun di diahuebs tabata pa Aruba. Mgr. Luis A. Secco, di Obispado di Willemstad a decreta y a tuma e decision cu pa Aruba tur celebracion Liturgico, pero tambe actividadnan di caracter informativo y catisashi, procesionnan, fiestanan parokial y actonan religioso publico ta keda pospone te proximo aviso. “Nos lo keda celebra e sacramento di enfermo y tambe liturgia di entiero den misa, tumando na cuenta e medidanan di higiena cu nos tur tin cu mantene na dje. Uzo di medionan social manera Radio, TV y Facebook ta recomendabel manera ya nos a haci.”
Pastoor Jairo Maduro a papia di e decreto emiti door di Diosesis di Willemstad cu nan ta analisando ainda. “Berdad el a cay manera un sorpresa pa nos y ta deliberando kico pa haci. Nos tin programanan prepara. Pa esaki a sinta varios biaha cu Conseho Parokial pa mira con ta atende cu e situacion den Semana Santa pa tur cos bay di forma sigur.”
Mirando tur loke nan a haci durante e pandemia pa protege e fielnan, nan ta spera di haya un splicacion for di Obispado di e motibonan pakico a saca e decreto pa Aruba. E cifrananan di Aruba no ta mescos cu esnan di Corsou.
