Ainda no tin un solucion pa e mas cu 140 Venezolanonan registra pa bandona Aruba. Ni combersacion cu Minister di Husticia Andin Bikker no a duna resultado.
Anais Sanchez, un di e pasaheronan cu a keda pega aki na Aruba, a splica cu berdad nan a papia cu e mandatario pero e unico cos cu a keda regla tabata cu nan no mester paga pa e test di COVID bek ora cu nan ta cla pa bandona e isla.
Tur e dianan, desde cancelacion di e vuelo, nan a logra come danki na organisacionnan of entre nan mes ta duna otro algo di come. Pero tin hende cu ta malo y mester di asistencia, y no ta haya esaki.
Tampoco a tende cu e fundacion presidente pa Marjorie Medina a logra haya solucion pa nan problemanan. E hendenan aki a entrega nan luga di biba y no tin placa pa cumpra cuminda. Riba dje no ta tende nada di e vuelo, ni di gobierno ni for di e compania aereo LASER.
E carchi cu casi nan tur tabata haya di Cruz Cora a keda cancela. Pues nan no por ni haci compras pa nan haya algun cos di come y di nan necesidadnan personal.
Loke nan ta scucha continuamente ta cu mester tin pasenshi. “Cu pasenshi nos no por come ni tin luga di drumi,” Anais Sanchez a bisa.
