Nos tin un gobierno cu ta sin palabra y no ta cumpli cu acuerdonan. Un gobierno cu ta gusta manipula y semper ta hunga victima. E manera di procede di e gobierno aki ta demostra un mentalidad antidemocratico.
Nos tin un minister president cu ta papia puro mentira y na final a coba un buraco cu e mes a cay den dje. COHO a cambia pa Onderlinge Regeling cu por bisa cu ta nada mas cu e RAFT. Mientras tanto tur e Landpakket cu ta den COHO si ta den full swing. Hulanda nunca a pone presion riba isla di Aruba sino como un bon piscado a laga pais Aruba horca su mesun curpa. E mega debe a cuminsa na partido MEP y awe e mesun gobierno bao asignatura di partido MEP a crea un GIGA DEBE. Si nos mira cuanto placa a wordo fia riba mercado internacional anto nunca nos por bati man pa un gobierno cu ta haci uzo di un intermediario pa subi mercado internacional.
E intermediario aki a contribui pa sink Aruba financieramente. Partido MEP a cuminsa cu n’e, partido AVP a sigui y awor partido MEP ta sigui cu mesun mal ehempel. E resultado di e mal gobernacionan ta cu pueblo ta paga tur debe. Si gobierno firma e RAFT of keda sin firma e RAFT lo no haci ningun diferencia. Tan ten cu e gobierno aki ta na poder lo no tin cambio di maneho y lo no uza ningun placa pa proyectonan nan nobo. Despues cu economia mundial cay nos lo mira e horizonte nobo.
Historia a demostra cu partido MEP ta un partido di medida y esaki ta demostra nan ideologia socialista/comunista. Pais Aruba a drenta un Status Aparte cu debe pa mal maneho di partido MEP paso bao di nan mando situacion financiero di Aruba a bay atras. Ora cu nos refineria Lago a cera su porta el a laga 340 miyon florin y te dia di awe ningun no a duna cuenta unda e placa a bay. E ta un tristesa di mira con hende grandi ora di campaña ta bisa un cos y despues ta dal pueblo un puñal den lomba.
Nos pueblo trahado mester a entrega beneficio. Nos por corda cu a kita 7.3/4 di salario y e solidariteitsbelasting di 8.2%. Un gobierno serio no ta sigui goberna a base di mentira y no por goberna riba un fundeshi di corupcion paso esey ta haci cu bo partido na mando no tin integridad y bo no ta miho cu esun cu a baha.
Gobierno ta papia riba e presupuesto di 2024 cu lo tin un surplus. Gobierno ta draai aña tras di aña riba un refinanciamento di debe di 105 miyon. E aña aki so gobierno a fia 474.25 miyon florin. E ora ey ken nos kier gaña cu pais Aruba tin un surplus den nos presupuesto 2024. Laga nos reflexiona y pensa si e gobernantenan aki ta stima nos Aruba dushi tera of nos gobernantenan aki a converti nan mes den un traidor di pais Aruba pa nan propio beneficio. Nos mester tuma Hulanda tambe na malo paso Hulanda tampoco no a sali na interes di e pueblo di Aruba. Hopi cos ta pasa tras di cortina pero Dios lo saca tur cos na claridad.
Pais Aruba a yega un crusada cu no por vota pa emocion mas ni pa ta simpatisante di un partido politico. Nos ta den e tempo pa tin gobernantenan di palabra y cu ta cana den integridad. No di hendenan cu ta yama nan mes cristian pero cu ta bay contra principionan di Dios.
For di 1986 bin ariba pais Aruba a wordo goberna pa hendenan sin integridad y locual cu nan a haci ta zink pais Aruba den debe. Esaki ta e tempo pa nos gobernantenan cu a masacra nos pais Aruba recoge e fruta amargo cu nan mes a sembra. Dios su tempo ta perfecto. Esaki ta haci cu partido Curpa ta keda e unico alternativa.
