Por mira cu cada biaha por sinti cu toch ta buscando un poder cu nan no tin y e ta mustra como si fuera nan ta logrando e tambe.
Parlamentario Rocco Tjon, lider di fraccion di MEP a splica cu pa loke ta e protocol di RST algun luna pasa, a tuma nota cu e protocol aki lo mester bay wordo prolonga. Un concepto a wordo entrega. Minister di Husticia tabata tin algun punto cu a causa preocupacion. El a bin parlamento tambe y parlamento completo a sostene e minister den e puntonan di preocupacion cu e tabata tin.
E puntonan di preocupacion tin di haber cu e autonomia hudicial. E tin di haber cu e autoridad cu RST tin contrario Cuerpo Policial. Hopi biaha, den aspectonan aki, ta trata di e aspecto di informacion.
Ken ta doño di e informacion, ken ta dicidi, ki ora e informacion por wordo una, etc.
E aspectonan aki tabata di importancia.
Tjon a remarca cu Minister di Husticia a reuni cu e comision fiho di asuntonan hudicial hopi biaha y a bin cu te hasta e comision cu ta atendiendo e protocol nobo aki.
E comision aki ta uno di peso. E ta consisti di diferente alto comisario den region, procurador general, pero tambe director di Hulanda encarga cu asuntonan policial. Nan tur a bisa parlamento cu nan ta compronde e preocupacionnan.
Nan a bisa cu nan lo respeta e preocupacionnan aki, ora nan bay defini e concepto di e protocol nobo. E protocol nobo aki, e intencion ta pa firm’e na Januari proximo, pero prome cu esey, e luna aki si ta bon, e lo wordo presenta na Parlamento tambe, caminda cu lo haya dos siman pa scrutina esaki y bisa si tin puntonan di preocupacion ainda.
Segun Tjon, siman pasa e comision fiho di asuntonan hudicial a reuni cu sindicato di polis SPA netamente riba e topico aki.
Nan preocupacion tabata esunnan di parlamento y minister di Husticia a señala na Hulanda. A splicanan tambe di e procedura y bisanan cu nan por ta trankil den e sentido cu ta comparti nan pensamento y obviamente no lo bay di acuerdo cu un protocol, cu un ta mina autonomia di pais Aruba riba aspectonan hudicial y na mes momento tambe, un protocol cu lo perhudica existencia di e departamentonan cu ya caba pa añas ta haciendo un tremendo trabao den Cuerpo Policial.
E poder di Hulanda
E punto di salida di tur hende, gobierno, den nomber di minister di husticia, di tur e fraccionnan tambe, a vocifera esaki. E punto di salida ta cooperacion.
Kier traha hunto, pero bo mester defini esaki bon.
Ta trahando hunto cu RST for di 2001 caba. Tin cu bisa cu e tabata tin su ups and downs. Pero na fin di dia semper a logra sali afo, pasobra tabata tin respet mutuo y saki mester ta e mensahe.
Kico ta hopi importante pa señala, e verhouding entre paisnan, esta Aruba cu Hulanda, Corsou cu Hulanda y St. Maarten cu Hulanda, ta diferente. Nos constelacion di estado ta diferente cu e otro paisnan. Diferente di e rijkswetten cu ta conta pa e otro paisnan, no ta conta pa pais Aruba y esaki tambe tin cu tene cuenta cun’e den e protocol.
E no ta un protocol cu tin cu conta pa tur e paisnan di reino, pero pa Aruba tin diferente punto cu ta otro.
Mensahe
E no ta un peliger pa tin dos cuerpo. Nos tin’e desde 2001, tempo cu RST a establece nan mes na Aruba. Importante ta pa defini hopi bon ken tin autoridad pa tuma decision. E ta algo cu a bin caba for di 10-10-10 na momento cu a bin cu e rijkswetten cu e constelacion di estado a cambia pa nos islanan ruman.
Na e momento ey caba a bin cu un structura nobo. Na 2017 of 2016, riba peticion di ex minister di Husticia sr. Dowers, a pidi pa reevalua e funcionamento di RST. A base di esey tambe obviamente ta bin un protocol nobo.
Esey ta e mensahe cu a manda pa sindicato di polis tambe, pa nan sa cu tanto gobierno como parlamento y tur fraccion den parlamento, riba e punto aki ta riba e mesun liña. Un biaha mas no lo bay di acuerdo cu un protocol cu ta mina autonomia hudicial y na di dos luga perhudica existencia di departamentonan den Cuerpo Policial cu ta haci e mesun trabao cu RST ta haci.
Tjon ta hopi trankil. E comision cu a duna un splicacion na Parlamento, consistiendo tur e funcionarionan aki, incluyendo un funcionario halto di Hulanda, nan a bisa cu nan lo respeta tur e puntonan aki, y na final lo mantene nan na e promesa aki tambe.
E pensamento mutuo
Paisnan den reino ta comparti e posicion di Aruba. Den e comision cu a haya informacion for di dje, tur e paisnan ta riba e mesun liña segun Rocco Tjon di MEP.
