AZV tin un maneho pa manda pashentnan afo. Vocero di AZV, Solange Tchong ta splica cu e ley di AZV ta defini berdad cu tur cuido medico cu un asegurado por ricibi, mester tuma luga na Aruba.
Pero na mes momento sa tambe cu nos infrastructura na Aruba no ta cubri tur cos. Den e sentido cu no tin tur ora cierto specialismo of cierto aparato den hospital of cierto conocemento. Den e ley di AZV ta defini tur test of examen of hasta tratamento manera un operacion cu por tuma luga na Aruba, bo tin cu haci na Aruba.
Pero na momento cu bo no por haya e cuido medico na Aruba, e ora ey tin e opcion pa haci un peticion na AZV.
E peticion aki ta bay via bo specialista medico, cu ta manda e peticion na AZV. Eynan tur cos ta cuminsa. Ta importante pa por splica cu ora un specialista ta haci un peticion na AZV, e ta haci’e basa riba kico e pashent tin, kico el a haci caba cu pashent, dus cua tipo di examen of test a tuma luga caba.
Tambe e ta duna caba un indicacion di kico e ta pensa cu lo ta e miho specialisacion unda cu e tin cu bay referi den e exterior y cua tratamento of operacion kier pa tuma luga.
AZV di su banda tin un comision medico cu yama Commisse Grens Overschreidende Zorg. Nan ta un comision cu ta evalua tur peticion cu ta drenta na AZV y nan ta traha independiente di AZV. Nan ta duna un conseho na AZV cu acaso tin cu bay exterior y ricibi ayudo, cua caso mester haya kisas un segundo opinion y cua casonan no mester haya aprobacion.
Con e procedura ta
Na momento cu bo haya un aprobacion di AZV, AZV ta esun cu lo percura pa duna tur informacion di bo biahe. Lo regla e cita na e clinica den exterior. Lo percura pa tin caba tambe un pronostico di tempo di estadia den exterior.
Dicon ta bisa un pronostico di tempo
Segun Tchong, e specialista medico cu a haci e peticion na AZV ta pone adelanta ki tipo di test of operacion e kier pa bo bay haci den exterior. Cada tratamento of cada test cu bo pidi tin un promedio, un gemiddelde, un averahe di un periodo cu bo ta spera cu bo e pashent lo keda den exterior. Pero nos tur sa cu e curpa humano ta uno cu por haya complicacion of situacion por cambia, na momento cu bo yega eynan. E ora ey semper cosnan ta bay segun e estadistica cu a wordo poni riba e papel.
Por ehempel e specialista ta bisa e pashent cu e lo mande pa un test. Por ehempel un test di schildklier y esaki ta dura entre 3 pa 5 dia den exterior.
Esey no ta nifica cu bo ta bay tres of 5 dia. Pasobra e por resulta cu tur cos ta bay netjes y berdad bo ta keda cla dentro di e tres of cinco dianan aki, pero bo por hayabo tambe cu bo ta bay y toch na momento cu bo yega den e clinica den exterior, sea ta Colombia, sea ta Hulanda, cu nan ta bisabo cu tin mas cos ta pasando y mester bay atende cu e pashent un poco diferente di loke tabata e plan inicial cu tabata tin of un poco diferente di loke e specialista medico a pidi for di Aruba.
Bisando esey, Tchong a splica cu AZV tin un maneho pa tur caso cu ta bay exterior. Tin contractonan cu e clinicanan den exterior. Esakinan ta basa riba loke ta yama tur e diagnosticonan cu tin, pero tambe tur e tipo di tratamentonan cu tin disponibel. Hunto cu esey tin hinca caba un promedio di tempo di tratamento.
Pero un biaha mas, no tur ora esaki ta bay segun cu AZV a pidi of segun cu e specialista ta receta.
Un otro ehempel ta, un pashent cu tin cancer. E ta wordo bisa cu tin cu bay den exterior pa haya tratamento. E por bien ta cu na momento di e peticion, specialista ta pone cu ta bay afo pa seis siman. Sinembargo durante di e tratamento, kisas ta wak cu e pashent a haya complicacion, of el a bira malo. Mester warda pa e haya un tiki mas forsa, pa e recupera. Kico dokter ta bisa e ora, pa bay salta un siman di tratamento, mester bin un otro siman di tratamento acerca. Tin diferente situacion individual. Situacionnan di e curpa cu ta duna cu toch tin ora mester desvia di e periodo cu inicialmente a wordo pensa.
Esaki ta algo cu ta maneha for di 2001 cu AZV a start, te cu awe, den 2018, unda cu nan tin nan comision medico cu ta evalua peticion, pero tin tambe nan departamento medico cu hunto cu e dokternan na Aruba, ta evalua tur caso ora nan ta bay exterior.
Tin hasta un sistema cu yama medical referral Aruba, cu ta un sistema digital unda cu ta den comunicacion cu e clinicanan den exterior.
E maneho di AZV ta na momento cu tin un peticion te na momento cu haya un aprobacion di AZV, ta nifica cu AZV ta regla bo cita cu e clinica den exterior, ta regla bo estadia, ta duna un aporte financiero cu ta un aporte chikito, pero pa yuda den gastonan por ehempel, di cuminda of awa cu bo mester cumpra durante di e estadia y tambe ta paga tur e gastonan medico di e tratamento cu bo ricibi den exterior.
Ta asina si, cu ta haci un distincion grandi den ora di regreso pa Aruba, bo tin e casonan cu ta bin cu vuelo comercial, esta cu un avion normal, y bo tin e casonan cu ta bin cu Air Ambulance bek.
E casonan cu buelo comercial, hopi biaha ta bay un poco mas lihe, pasobra ta haya e vuelonan ey hopi mas facil pa bin bek. Cu e casonan di Air Ambulance, mas factor ta hunga un rol.
Ora cu un pashent mester regresa for di Colombia por ehempel pa Aruba bek, hopi biaha AZV ta bisa ora pashent ta uitbehandeld, esta el a cla cu su tratamento, e lo tin cu warda toch mas of menos 1 pa maximo 2 siman prome cu bin bek, pasobra AZV mester percura y confirma cu por haya un peticion di Air Ambulance, pero tambe na momento cu un pashent tin cu bin bek Aruba pa wordo interna bek den hospital, nan tambe mester tin e luga pa e persona por wordo interna bek.
Tin diferente factor cu ta hunga un rol. Pero e maneho general ta cu AZV ta duna un aprobacion, bo ta sali pa e pais di tratamento cu cita. Ta evalua durante di e estadia si tratamento ta bayendo bon, si tur cos ta OK y e momento cu bo ta bin bek Aruba, ta na e momento cu specialista di exterior ta manda bisa AZV cu e pashent ta cla pa bin bek, e ora ta bay wak e circunstancia den cual un pashent mester bin bek.
Pasobra tin hende cu por biaha riba un vuelo normal, pero tin hendenan tambe cu tin cu bin bek cu un Air Ambulance y generalmente ora nan ta bin bek den Air Ambulance, ta pasobra cu tin cu wordo interna na hospital di Aruba.
Cambio
Segun Tchong, e aña aki a habri na hospital e departamento di cardiologia intervencionista, unda cu ya caba por atende cierto pashentnan. Por ehempel pashentnan unda cu cardiologonan por pone un stand, den e caso aki dr. Casper Lacle.
Esey caba ta un progreso pa Aruba.
Semper a wak tres top den cuido medico den exterior. E prome tabata hendenan cu malesanan cardiovascular. E pashentnan di oncologia, pashentnan cu tin cu ribici tratamento di cancer, pa cual tambe ta buscando caba e solucion y instituto Medico San Nicolas ta bezig cu esaki.
E otro parti cu ta wak, ta hopi pashent cu complicacion por ehempel di malesanan manera diabetes. Bo ta wak esey ta desaroya su mes den mas caso di malesanan di wowo of problemanan cu wowo.
Esey ta haci cu AZV sigur ta evalua esaki y den futuro por spera por ehempel cu AZV ta bay amplia kisas e parti di e cuido pa hendenan cu malesanan di wowo.
Pa loke ta e parti di curason, a cuminsa cu cardiologia intervencionista. Idea ta pa esaki wordo amplia. Cu poco poco bo ta sigui tuma mas caso cu bo mes por atende na Aruba.
Y sigur, na momento cu Imsan keda cla, esey lo nifica tambe cu un gran parti of un grupo en todo caso di pashentnan oncologico, lo por wordo yuda eynan.
Tin diferente desaroyo sigur. Uno cu por menciona mas recien, cu na 2001, na momento cu AZV a cuminsa con un grupo di pashent cu reuma tabata pidi pa trece un reumatologo, pa trece specialistanan di e malesa aki.
18 aña atras, no tabata por. Awo ta asina leu cu ya caba a habri un departamento di reumatologia na hospital y esaki ta mustra cu tabata tin desaroyo riba e area di cuido medico na Aruba.
Pasobra 18 aña pasa no lo tabata posibel, pasobra ta un inversion, ta costa extra placa. Ya awendia ta wak cu a logra y tin un propio departamento di reumatologia na Aruba, den colaboracion claro cu Clinica di Hulanda. Pero a logra di sigur amplia y mehora cuido medico y hasta trece cuido medico nobo na Aruba.
Sigur esaki ta habri caminda pa 2019, na unda cu ta wak cu tin topiconan cu mester bay wordo discuti. Un otro topico cu tin cu wordo discuti ta e cuido di nos grandinan, na unda ainda mester defini of dicidi si kier tuma esaki full bao di AZV si of no.
Tambe ta keda cu e discusion di e ley di AZV, si ta bay laga e ley aki asina si of no y esaki, e decisionnan cu wordo tuma den 2019 over di e ley di AZV, lo defini con lo sigui cu e resto di inversionnan cu AZV lo bay haci.
