Varios minister y parlamentario a publica tur sorto di sosten na e cacho Khaleesi, cu a fayece den fin di siman, debi na maltrato y negligencia di su doño, Alberto Groeneveldt. E ultimo aki a mar’e na cabuya di tal forma cu e cacho a choca su mes te sufri lesionnan grave cu finalmente a caba cu su bida. Yamadanan di fundacionnan cu ta rescata cacho el a ignora. E ex-politico di MAS no tabata sa mes cu “su” cacho mara den cura a duna luz na seis puppy.
Pero e locual cu e politiconan mester haci awo, no ta hunga populista, pasobra esey lo no trece e cacho bek, sino mester cambia e ley cu nan a aproba den Parlamento di Aruba. E ley “Landsverordening houdende regels inzake het houden van honden (Hondenverordening)” trata dia 5 di september 2012 den e reunion publico number 39, no ta sirbi. E ley presenta pa ministernan Mike Eman, Arthur Dowers y Richard Visser awo tin polisnan cu man mara, pasobra e falta contenido y riba dje e gobierno aki no ta aplic’e debidamente tampoco!
Polis awo ta cu man crusa, mescos fiscal na Ministerio Publico, cu no por duna ordo pa detene e abusado despues di e acto. Manera ta conoci, ora mester detene un sospechoso despues di un acto criminal, mester permiso di fiscal pa haci esaki. Un polis riba su mes no por detene hende sino ta riba ordo di un fiscal.
Den e caso specifico aki, e ley ta traha di tal forma cu si un hende bay cas di un otro y mata su cacho, tin posibilidad pa detene un rato pa interog’e. Pero den caso cu un hende maltrata su mesun cacho, neglish’e y cu consecuencia fatal, no tin e mesun peso di ley. Por solamente yam’e aden, tuma su declaracion y mand’e cas bek pendiente e decision di fiscal cu por varia entre haci trabou pa comunidad of un multa.
Por sinti for di e comentarionan di comunidad e ultimo dianan aki, cu tin interes grandi pa bin cambio den dicho ley y cu por persigui un hende penalmente pa mata un bestia asina sin mas. Specialmente ora cu a yama bo, purba bo y conscientemente bo ta nenga ayudo y laga e bestia sigui sufri bou bo dak te ora e muri…algo asina no por bay sin mas. Por lo menos dos minister, esta Ursell Arends y Evelyn Wever-Croes a bisa cu e asunto no por keda asina pero nan no por haci nada otro tampoco debi cu e ley ta suak. Ta spera cu e mesun entusiasmo cu tin awo pa cu e tema aki, por encurasha ambos mandatario pa propone cambio di ley y haci cu e peso di ley lo bira mas pisa ora di negligencia y maltrato cruel asina.
Dialuna caba Alberto Groeneveldt a atende un cita na polis, a duna su declaracion y el a bay su cas. El a bisa di no a hacie pa malo y cu e ta sinti masha malo cu e locual a sosode. E ta sigura di ta stima bestia y ta rescata mas cacho cu e por. E tin como 13 cacho den su cura y un coneu. Pero, di acuerdo cu e fundacion cu a bay rescata e cacho, ta parce cu mayoria ta desnutri y mal cuida. Esun cu a muri mes tabata yena cu carpata, tabata desnutri y mal herida. E seis puppynan tur ta desnutri y awo ta purbando pa cria nan cada dos ora pa salba nan bida.
