Un mayoria limita den parlamento, esta 11 di e 21 miembronan presente a duna Gabinete Wever-Croes II luz berde pa sigui cu nan maneho financiero pa e lunanan nos dilanti. Oposicion, consistiendo di 10 asiento a vota contra. E reunion a dura como 12 ora largo, mientras cu mayoria tempo tabata perdi na discursonan demasiado largo, sin contenido y mas bien hungando politica.
Pa gobierno, e presupuesto no a subi, sino mas bien a maniobra den e cuadra financiero acorda desde aña pasa caba pa e presupuesto di e aña aki. Por ehempel door di ceramento di John Wesley College, a baha e suma cu ta subsidia e fundacion y e placa ey a aloc’e pa cab’i drecha stadion Guillermo Prospero Trinidad na Dakota. Den tur otri ministerio tabatin movecion y realocacion di fondo di un post pa e otro. Den algun caso, por ehempel cerca Minister Ursell Arends, su presupuesto a hasta baha cu Afl. 301.500,= compara cu loke a aproba aña pasa.
Mester menciona cu aña pasa coalicion a trata e presupuesto riba protesta di oposicion. Mayoria reunion no a ni atende debi cu nan tabata contra cu gobierno a pusha pa trata e presupuesto sin aprobacion di CAft y cu conseho negativo di Raad van Advies. Asina mes a aproba e presupuesto di 1557 miyon florin na entrada, banda di e mesun suma na gasto y un deficit financiero di 25 miyon, cu ta 0.4% di nos GDP.
Durante e reunion ayera nochi oposicion a critica e echo cu a logra wanta e presupuesto neutral, no pasobra a baha gasto, sino mas bien a aumenta entrada. Gobierno ta cobrando mas na impuesto door di medidanan y BBO na frontera. Tambe tin un “meevaller” na entrada di ATA y dividendo di Banco Central, pero a bira hinca e sumanan aki den caha di gobierno sin indica unda specificamente nan ta bay.
Di otro banda, oposicion no semper tabata uni. Riba e tema di e guera entre SABA y Minister Ursell Arends, mayoria ta na fabor di e maneho estricto di e mandatario. Fraccion di AVP a presenta un mocion pa no corta den e subsidio pa no perhudica e trahadonan y e clientenan. Gobierno di su banda ta insisti cu tin practicanan dudoso den e fundacion cu merece investigacion. No ta haya cifranan anual pues no sa kico SABA ta haci cu placa di pueblo. Mester menciona cu parlamentario independiente Gerlien Croes y Fraccion di Accion 21 a para banda di AVP den esaki, pero Fraccion di MAS y parlamentario Rycond Santos do Nascimiento a para banda di gobierno, indicando cu SABA mester cumpli cu ley!
Cu e aprobacion aki Gobierno di Aruba a cumpli cu ley door di presenta su cifranan real na tempo y pa haya aprobacion adelanta di parlamento pa haci cambionan den e presupuesto di e aña aki ainda. Den pasado tabata gast’e prome y despues legalisa e gasto den un reunion di parlamento. Tocante e cifranan anual cu Gabinete Wever-Croes debe di su prome gabinete ainda no a bin claridad di ki tempo por haya esakinan pa mira y aproba.
