Minister Glenbert Croes a habri siman cu un anuncio grandi y positivo. Pa prome biaha den ultimo dos decada cu cifra ta mas abou cu nunca antes bista. Cifra di desempleo a bahe te na 4.3%.
E cifranan cu e mandatario a presenta ta bay bek te na aña 2000 cu un desempleo di 4.8%. Dje aña ey el a keda fluctua yegando te na nivel di 11.4% di desempleo. “Pero awe orguyosamente nos por anuncia cu nivel di desempleo na un ‘record-low’ di 4.3%”, asina e minister a anuncia cu un sonrisa riba su cara.
Tempo cu Minister Glenbert Croes a bira Minister di Labor na 2017, el a hereda un desempleo na 8.9%. Ya pa 2018 su empeño como Minister di Labor a cuminsa duna su frutonan y desempleo a cuminsa baha yegando 7.3% y na aña 2019, 5.2%. Lastimamente aña 2020 Corona virus a bati na nos porta cu tur su consecuencianan. Ta momento di hopi desespero nos a biba como pueblo y como pais. Pero asina mes nos tur a cera cabes pa hunto surpasa e momentonan dificil cual nos a logra tambe.
“Awe nos economia ta fuerte. Nos turismo ta floreciendo haciendo Aruba e isla lider di recuperacion den Caribe. Nos hendenan ta trahando”, e mandatario cu mas aña di experencia como minister a splica. E ta convenci su cu maneho di pone localnan prome na trabou ta dunando su fruto. Mester menciona cu Departamento di Labor (DAO) hunto cu Oficina Central di Estadistica (CBS) y Banco Central di Aruba a ehecuta e “Labour Force Survey” aki.
