Riba 7 di october ultimo, 24ora.com a haci un reportahe pafo di Parlamento di Aruba, señalando cu parlamentario Ricky Hoek di MEP a viola regla di AruParking. Personal di AruParking a pone un sticker na bentana di auto di Ricky Hoek mirando cu e tabata mal para y ta viola regla. Como un parlamentario, ta importante pa duna ehempel na comunidad, locual Hoek no a haci. E auto di Ricky Hoek ta un Toyota Rush numera A-560.
Recien, Ricky Hoek a cuestiona e reportahe di 24ora.com informando cu e informacion no ta corecto. E parlamentario cu den eleccion ultimo a ricibi no menos di 135 voto ta cuestiona mal informacion di e plataforma di noticia mas grandi na Aruba. E parlamentario durante su conferencia di prensa y den un comunicado a bisa cu; e no a viola ningun regla y cu a apenas riba 5 di october 2022 AruParking a informa di nan maneho nobo pa cual e dia ey nan a plak e sticker riba su auto.
Locual e parlamentario a lubida di informa ta cu; for di 28 di september el a ricibi un e-mail for di secretariado di parlamento, unda e informa tur parlamentario di e maneho nobo. Den e e-mail ta para bon cla cu ta desde 3 di october AruParking lo cuminsa bek cu su controlnan. Pues, e parlamentario tabata bon na altura y toch a viola regla. Na final di e conferencia di prensa, Ricky Hoek ta pidi pueblo pa respeta e area di parkeo di tur parlamentario.
