Pa algun e ta un hilaridad, ora cu pueblo ta depende cu su representantenan ta den parlamento pa debi con por hiba e pais dilanti pero ta papia di “views” y ken ta bon mira y ken no.
Tur cos a cuminsa ora cu Miguel Mansur, lider di Accion21 a opina cu e “views” pa cu e reunion publico ta masha abou. Apenas algun dies hende ta sigui e reunion riba plataforma social. Segun e politico, pueblo ta fada di e gobierno y kier mira un cambio hopi pronto.
Di otro banda, Marco Berlis di MEP a reacciona bisando cu, Miguel Mansur kende ta papia di “views” t’e mesun persona cu ta paga un advertencia riba Facebook pa pueblo like su pagina y haya chens di gana mil florin cash. Segun Berlis, esaki ta un muestra cu ni e Mansur mes tin views y di un forma paga ta purba pa haya hende pa siguie.
Ricky Hoek ta parlamentario pa e fraccion geel, el a comenta cu tipo di persona manera Mansur kende ta papia di “views” no ta ni presenta na trabou. Ta leu a leu sa mir’e den sala p’asina e haya poco “views”, ya cu esey ta e unico forma cu hende por wak e.
E presidente di parlamento ta parce cu tambe tin problema cu e “views” di parlamento ta abou. El a hay’e asina importante cu hasta a bisa cu pa e proximo reunion e lo sinta den banki como parlamentario pa e por debati. Di e forma aki e lo por subi e “ratings” y “views” di parlamento.
Mansur no a gaña si, ora mira e resultado di “views” di reunionnan di oranan largo, nan ta score hopi abou. Si compara por ehempel e pagina di Facebook di Parlamento di Aruba, kende tin apenas 12 mil siguido y un pagina di 24ora cu tin mas di 187 mil siguido, por duna e parlamentario rason cu nan “views” ta hopi abou y cu por conclui cu casi no tin interes den e politiconan aki mas. E ta conta tanto pa oposicion y coalicion.
