Parlamentario Howell ta na altura di e situacion reinante na Colegio San Nicolas. No pasobra el a lesa esaki den medionan di prensa, sino pasobra tanto studiante- como docentenan a yega su cas cu e preocupacion pa loke ta pasando na e scol.
Alan Howell, parlamentario di fraccion di POR, den un conferencia di prensa mainta a papia riba e problema existente na Colegio San Nicolas. “Como representante di pueblo ta mi deber pa scucha tur loke ta pasando, pa trece claridad y trankilidad den enseñansa. Den enseñansa ta un di e sectornan cu menos lo bo kier turbulencia. Habri aña cu turbulencia ta algo cu ami lo no bay para p’e.”
El a haci un promesa na tanto studiante como docentenan cu nan por keda trankil. E lo bay papia cu e minister pa scucha su banda, ya cu tur informacion cu e tin awor ta den prensa a lesa di dje. E ta haya cu den parlamento e minister mester bay responsabilisa su mes.
Den e caso aki, el a bisa, no ta bay si ta sostene minister Lampe of no. Como parlamentario mester busca tur forma pa trece trankilidad den cas. “Caminda cu mi mira cu mi tin cu para tras di docentenan y di e studiantenan, semper como parlamentario mi sa di haci esaki varios biaha. Mi mes a yam’e varios biaha aki den parlamento y nos a convence pa hala cierto decisionnan atras. Mi por bisa cu boca grandi cu semper mi a haci mi trabou como defensor di pueblo, como un parlamentario cu ta para tras di e ciudadanonan.”
Si ta keda mira cu tin turbulencia den enseñansa, ta keda na parlamento pa bolbe “trek e recht”. E trabou di parlamentario, e ta bisa, no ta bay si ta sostene e minister of no, pero pa controla cu e trabou ta bay bon. “Si e trabou, na opinion di parlamentarionan, no ta cuadra, e veld di enseñansa cu por conta cu mi ta bay hala atencion di e minister manera debe ser. Cualkier cos cu ta bay perhudica enseñansa, lo mi haci mi trabou manera debe ser pa drecha esaki.”
