Diahuebs ultimo por a tuma nota di otro hazaña di partido POR den Parlamento, caminda cu minister Marisol Lopez Tromp a presenta pa trata presupuesto di DOW caminda tur hende a spera cu den tempo di crisis, e Minister lo bin prepara den Parlamento cu un presupuesto adapta na e realidad cu nos pais a conoce despues di corona virus.
Arthur Dowers di fraccion di AVP a mustra cu tur hende a sali engaña un biaha mas ya cu e minister a presenta un presupuesto manera cu e no ta na altura cu e pais ta pasando den un crisis asina serio.
“Sin ningun interes ni comprension pa e dolor sufrimento y angustia cu ta biba den nos pueblo, e señora aki no a corta nada, ni un florin den su presupuesto. Entre otro Parlamento a mira cu tin sumanan ridiculamente halto den e presupuesto, pa ehecuta proyectonan, cu nunca por ta prioridad na e momentonan aki, caminda tin tanto hende cu ni por pone pan riba mesa. Increibel y c’un facilidad asina nunca bisto, Minister Lopez Tromp tin un suma di 800 mil florin pa awa no para riba caya, banda di esaki e tin 9 miyon pa manda Hulanda pa renoba Arubahuis y riba dje e tin 120 mil florin presupuesta pa cumpra decoracion pa Pasco pa fin di aña.
Con cruel e mandatario y gobierno por ta awor, caminda cu tin hopi hende kendenan no tin cuminda ni awor pa pone riba mesa, pa por corda riba Pasco pero minister y gobierno kier gasta tanto placa pa decoracion pa Pasco, loke ta sumamente tristo.
Partido MEP cu den Parlamento mester baila segun POR ta toca, un biaha mas mester a baha cabes y acepta e humiyacion contra pueblo aki.
Parlamento si a corta su presupuesta mandando placa pa gobierno y gobierno mes ta bin Parlamento, burla di parlamento y tristo cu e por zona, un bes mas a core canta ‘voor’ y pro bagamunderia y lubidando por completo riba pueblo, cu ta pasando awor aki den un situacion hopi dificil y awo lo mester bay paga pa e debenan aki cu e minister y gobierno ta creando sin cu esaki lo por wordo hustifica den e momento super dificil aki. Mientras cu a pidi trahadonan di gobierno pa entrega parti di nan salario, parti di nan beneficionan, a pidi pensionadonan pa entrega cierto beneficionan, gobierno ta bin ranca 9 miyon florin pa drecha Arubahuis.
Simplemente e cos aki ta un locura, un falta di respet total pa henter pueblo ya cu no ta trata aki di un urgencia cu pueblo tin cu paga pa esaki, mientras cu pueblo mes pa gran parti, no sa con pa sali di situacion financiero cu nan a haya nan mes aden dor di e corona virus.
Ningun momento Minister Lopez Tromp por a hustifica e hecho cu na e momentonan aki drecha sistema di riool caminda awacero ta para ora cu yobida cay na abundancia por ta na su luga riba e derecho di nos pueblo pa por paga su debenan di cas manera coriente y awa, corda pa placa pa famianan come manera cu mester ta.
Ta un crimen di marca mayor cu gobierno ta bay baha y hasta den algun caso elimina subsidio pa organisacionnan cu tin mester di esaki pa yuda pueblo, pa asina cumpra adorno di Pasco pa fin di aña pa e suma di 120 mil florin cu simplemente no ta necesario ya cu si sigui declaracion di Ministernan di Gabinete Wever Croes, e pais lo conoce un ‘normal nobo’ caminda sigur adorno di Pasco no ta bin na consideracion mes na e momentonan dificil aki.
Automaticamente ta lanta e pensamento si Gabinete Wever Croes realmente tin e ‘hende central’, si nan ta compronde kico e pandemia cu Aruba tambe ta sufriendo di dje ta nifica pa haci e tipo di locuranan aki.
Muchanan no ta bayendo scol, ciudadanonan cu e fin di luna aki no por a cobra salario, negoshinan cu nan porta ta cera y no ta mira placa drenta y ta mesun negoshinan aki Minister kier uza 120 mil pa pone luz color pafo riba caya, cu ta simplemente un locura.
Sinembargo ora cu a spera cu e tres fraccionnan cu ta sostene gobierno den Parlamento, como berdadero representantenan di pueblo lanta para y bisa Minister Lopez Tromp cu esaki ta inaceptabel, nan ta bira sostene e presupuesto di e Minister ya cu aki un biaha mas, keda den gobierno ta mas importante cu interes di pueblo.
Algo di condena y ta algo cu nos ta sigur cu Hulanda tambe lo cuestiona pa e tipo di locura financiero aki cu Gabinete Wever Croes ta hibando, cu simplemente no ta cuadra cu loke nos pais ta pasando aden,” Parlamentario Arthur Dowers a declara.
