AVP ta cana den pueblo y ta sinti cu e contenido di Banco Central mes, cu sr. Eman a presenta ta contenido cu ta wordo sinti tambe den comunidad, comercio y pueblo.
Segun parlamentario Arthur Dowers, unda cu cana, unda cu bay, ta wordo bisa cu hende tin hopi dolor.
Un di dos cos cu por ripara, ta cu hopi hende a cuminsa bira sabi, pasobra nan a ripara cu e Gobierno aki a bin ta bati nos cu medida, abusa di nos, e ora awo ta bay mira con ta bay yega na nos cosnan, sin cu nos tin cu cana tur e schakelnan di 6% di BBO den curpa, mas loke ta bin acerca den loke ta e aspecto acumulativo di dje.
Segun Dowers, esey a pone hende bay spaar nan placa y cumpra cos online. Ta nan derecho. Nan kier wak con nan ta bay sobrevivi, den un pais unda cu tin un Gobierno cu semper a bin pa bati pueblo cu medida y semper ta abusa di e pueblo.
E parti di mas tristo ta, cu e hendenan aki a bin na poder, a aumenta tur debe di gobierno.
E hendenan a bin den Gobierno, no a baha ningun cantidad di minister na shete, nan a kita cierto hendenan, persigui nan politicamente, nombra nan friends & family y sa ki sorto di hendenan ta.
E cos di mas tristo ta cu a aumenta gasto di pais. Si ta bisa cu tempo Dowers tabata minister, awo e no ta minister mas, con bin e placa no tey cual el a horta.
A confirma cu ta gaña. Si en caso cu a bin, a traha asina bon, con bin a aumenta gasto di pais Aruba.
Tambe, ora cu ta bati pueblo cu Medida, y bisa pueblo cu ta batinan cu heffing, pasobra tin cu paga debe di AVP, con por ta posibel cu e debe a aumenta?
Si ta bay paga debe di gobierno anterior y coy placa di pueblo, ta den bom e ta. Partido MEP a tuma pueblo haci. Nan ta sigui tuma pueblo haci y nan tin hopi curashi. Pasobra nan ta haci’e cu un cara seco.
Dowers a haya un video cu nan ta manda rond y a mira poco cos kico e hendenan tabata papia.
E actual minister presidente a yama su colega scorpion pa un hende sushi, pa un hende ladron, pa un hende sin berguensa.
Con por ta posibel cu bo por a yama un hende pa tur sorto di cos y bo no kier saca potret cu mas amor.
Pero kier saca potret cu corupto, sin berguensa y ladron. Unda nos ta bay cu e pais aki unda cu hende a perde cuero di cara principio y awor aki, ken tin cu paga pa esey, nos pueblo.
Ta spera cu tur hende habri nan wowo, horea. Pueblo mester keda circula e informacion aki pa nan por realisa nan mes cu nos tur ta bira victima di un grupo di hende cu a tuma e pueblo aki haci.