Recientemente, den un esfera ameno, un delegaciondi gobierno y parlamento a reuni cu dr. Francio Guadeloupe, cu tabata na Aruba en conexion cu un investigacion. Dr. Guadeloupe a nace na Aruba, a biba den e districto di San Nicolas y actualmente ta residencia na Hulanda, trahando como ‘Associate Professor’ den ‘Anthropology’ na Universidad di Amsterdam. Alabes e ta ‘Senior Researcher’ na Royal Netherlands Institute of Southeast Asian & the Caribbean Studies.
Presente na e reunion tabata t’ey Minister di Enseñansa y Deporte Endy Croes, Harold Kelly y Terry Gumbs. Durante e encuentro dr. Guadeloupe a duna informacion y splicacion extenso di e estudio cu e ta realisando como tambe a elabora riba diferente puntonan interesante.
Desde luna di januari 2021 a nombra dr. Guadeloupe, pa un periodo di cinco aña, como ‘Program Chair’ di Island(ers)s at the Helm; cu ta un programa di estudio multi disciplinario riba e cambionan climatologico cu islanan CAS y BES ta enfrenta. E estudio lo tin un duracion di cinco aña y Netherlands Organization of Scientific Research (NWO) ta subsidia e investigacion cu un suma di 3.5 miyon Euro.
Lo publica e rapport final y lo tin un instituto cu ta bay duna conseho na Gobierno con pa ‘deal’ cu e cambionan climatologico ta trece cu ne y cu lo por afecta sociedad pero tambe economia di un pais.
Desde fin di siglo diesnuebe, mundo a cuminsa bira mas cayente, door cu e consumo di ‘fossil fuel’ a subi drasticamente durante e ultimo decada cu consecuentemente a haci cu planeta a cuminsa bira mas cayente. Segun pronostico di e expertonan di e materia, mundo a subi cu cuater grado na aña 2001. Pa preveni e sigui subi, na aña 2050, e uzo ‘fossil fuel’ mester ta na cero.
Si sigui uza ‘fossil fuel’ pa 2100, lo tin ‘flooding’ di seis pa ocho meter halto. Lama, infrastructura, edificio y islanan por disparce for di mapa. Coral y e bida di e coral lo muri door di e aumento di C02 den awa di lama, horcan y temporada di horcan ta bira mas intenso cu e posibilidad cu Aruba tambe por cuminsa experencia horcan, di cual Aruba no ta traha pe.
Durante e reunion dr. Guadeloupe a elabora cu clima tin efecto riba e tipo di economia y sociedad di un pais. Aruba su clima ta atrae mas turismo y ta clasifica bou di ‘hospitality based’, cual industria ta keda hopi importante pa nos. Aruba no por subi mas di 1.5 grado.
Tambe dr. Guadeloupe a comenta riba e transicion di ‘fossil fuels’ pa otro tipo di fuel, hydrogen ta bon pero e no ta algo cu por switch riba dje mesora. Bo mester di gas pa por yega eynan. Hydrogen na e momento aki ta hopi costoso y gas lo yuda baha e ‘global warming’. Parlamentario Alvin Molina a desea dr. Guadeloupe y ekipo hopi exito cu e proyecto y investigacion!
