Un topico cu ta tene mundo pendiente for di luna di maart caba of prome cu esey, ta e tema di vacuna, ki dia por spera un vacuna na mundo. Ki dia esaki ta bira disponibel.
Segun minister Dangui Oduber di Salud Publico, gobierno di Aruba sigur ta den contacto cu gobierno Hulandes pa den caso cu tin un vacuna disponibel pa duna cooperacion pa nos tambe tin accesibilidad na e vacuna.
DVG tabata tin un reunion cu PAHO y den e reunion aki PAHO a informa DVG cu na e momentonan aki tin 6 vacuna den e ultimo fase di desaroyo y nan ta conseha Aruba pa ya caba cuminsa haci e prome ordo prome cu dia 15 di september.
Ta conseha Aruba pa haci un ordo basa riba 20% di nos poblacion. Lo bay adapta esaki y ta desea pa ordo un tiki mas.
E prome gruponan cu lo bin na remarca si en caso e vacuna bira disponibel, ta e personanan cu ta dunadonan di cuido, esnan cu ta riba 65 aña di edad y esnan cu tin malesanan cronico.
Aruba sigur lo busca e manera con pa financia esaki. Esaki ta un noticia sumamente positivo cu tin 6 vacuna den e ultimo fase di desaroyo. Ya caba Aruba ta bay haci e prome ordo den bon cooperacion cu PAHO, prome cu dia 15 di september lo haci esaki.
Naturalmente esaki tin su costo cun’e cu tin cu busca un manera den e situacion financiero cu nos ta aden, con ta bay financia esaki. Ta importante pa haci e ordo aki cu si en caso e vacuna bira disponibel, Aruba tambe bin na remarca pa haya e vacuna aki mas lihe posibel.
