Diasabra anochi, despues di 11:00 pm, polis a bay cu urgencia Yucuri pa un pelea entre bisiña. Diasabra anochi despues di 11’or di anochi, Polis a bay cu urgencia direccion Yucuri pa un pelea entre bisiña.
N’e sitio, polis a intermedia y a papia cu ambos partido p’asina por tin un bista di loke ta pasando entre nan y origen di e problema aki. Ta trata aki di un problema cu tin un tempo ta andando. Aparentemente polis a yega di bin na mas di un biaha n’e mesun adres aki, caminda cu cada bisiña ta duna su band’i medaya.
Segun cu por a compronde, un di e bisiñanan tin tres pitbull den cura y cada biaha cu e cachonan sali, nan ta haci desaster den cura di e otro. Fuera di esey nan a yega di ataca y mata un di nan pushinan. Segun e otro bisiña, e cachonan ta hopi flaco y den varios ocasion a gara nan ta coba den nan bari pa asina nan haya co’i come.
E otro bisiña, doño di e pitbullnan no a keda atras y a bin cu un contraatake bisando cu ta imposibel cu su cachonan a hacie, pero mas bien e ta sospecha cu t’e otro bisiñanan a yega di susha nan paña na liña y cu nan lo a drenta su cura pa kibra e porta unda e cachonan ta. A papia cu ambos partido y a laga doño di e cachonan sa cu su mascotanan ta mal nutri y tin chens cu por kita e cachonan fo’i dje.
For di un di e testigonan polis a logra haya un video unda cu por mira con flaco e cachonan ta y cobando den sushi pa haya algo di come. Ta un problema caminda cu ambos partido ta punta dede riba otro y no por yega na un acuerdo mutuo. Despues di a scucha ambos partido y a papia bon cla cu cada un di nan, polis a sigui cu su patruya.
