Cu vuelo 765 di KLM a yega awe 2 di augustus un cantidad di 90 studiante
Arubano pa sigi un estudio avansa na nivel di HBO of Universidad na Hulanda. Esaki ta e prome vuelo cu studiante cu ta yega Hulanda. Ta trata aki di e studiantenan cu ta bay studia na Rotterdam, Arnhem, Nijmegen, Wageningen, Enschede, Deventer, Zwolle, Groningen, Leeuwarden, Eindhoven y Maastricht.
Na Schiphol e studiantenan pa prome biaha a wordo saluda pa Prome Minister mr. Evelyn Wever-Croes. Tambe Minister Plenipotenciario Suplente mr. Ady Thijsen y directora a.i. di Arubahuis drs. Glenda Hernandez a yama e studiantenan bonbini. Un delegacion consistiendo di funcionarionan di Departamento di Enseñansa di Arubahuis, studiementor y miembronan di e POC (Plaatselijke Opvangcommissie) presente den sala di yegada di Schiphol.
Despues di casi un ora y mey cu e avion a baha e studiantenan por a piki nan maleta y a sali pafor di e sala di yegada. Akinan na un forma bon coordina y organisa a haya instruccion di personal di Arubahuis, mentor y miembro di e POC unda nan mester a para den grupo pa warda nan turno pa bay na e bus cu lo hiba nan na nan ciudad di estudio.
Tabatin hopi atencion di prensa Arubiano pa e yegada. Mañan e grupo aki di studiantenan lo cuminsa cu e programa di “opvang” obligatorio, cual lo dura entre tres dia y un siman. Durante e dianan aki e studiantenan nobo lo haya e guia nesesario den nan ciudad unda pa sigur cuater aña of mas nan lo biba y studia.
E prome aña e studiantenan ta ricibi guia di e studiementor, pero pa e resto di su estudio e ta cay bou di Arubahuis.
