Un biaha mas e proyecto di DOW den Columbusstraat ta confrontando problema. Ta parce cu e no kier mira su final.
E prome parti unda e parkinglot pariba di Ex Breenchie ta, ta kedando cla. E ta kedando hopi bunita. Sinembargo den e proceso a topa cu cierto sorpresa den Columbusstraat. E canal di awa cu ta pasa for di hospital bieu pa Lagun ta den mal estado y a cuminsa cay den otro. Un sorpresa inespera cu awo mester wordo drecha. E trabou ta pega completamente.
Ora para eybanda ta mira cu tin awa sushi para, hole stinki, memey di caminda. Mas cu un buraco tin. Mientras cu e contratista ta cla pa sigui, ta tende cu e hefenan di departamento mester firma prome cu e trabou por continua. Eynan cos ta pega pasobra cada biaha ta tende cu mester warda. Un hefe ta dicidi un cos y e otro ta dicidi otro. Mientras cu e hefenan den departamento di gobierno ta keda midi forsa, e caya ta keda cera y kibra mientras negoshinan ta keda perhudica.
Un burocracia completo tin ora cierto departamento di gobierno ta perhudica henter un desaroyo. Nan traha of no traha ta cobra. Pero sector priva cu mal trabou of bon trabou di e departamentonan di gobierno, nan si mester cumpli cu obligacion di tur luna cual ta tambe cumpli cu e impuesto pa paga e hefe di e departamento di gobierno.
Mientras e hefenan keda midi forsa y no firma pa e trabou sigui, comerciantenan ta esnan perhudica y henter e area cu mester a keda cla den algun siman lo dura algun luna. Bonbini na un pais cu parce mas un republica di banana.
