Alrededor di 6:00 di atardi den parkeerplaats di un supermercado na Noord, un comerciante di drecha y bende acesorio di auto a bay pa cobra un cliente. E motibo di esaki tabata pasobra e persona a bay for di e luga sin pag’e. Consecuentemente un discusion a cuminsa entre ambos partido.
Esaki a bay fo’i control y segun testigonan, e cliente lo a menasa e comericante, kende di otro banda no a acepta esaki. El a defende su mes door di coy un bloki y tira esey riba e cliente.
E clientenan di e supermercado cu tabata den e parkeerplaats tabata terorisa y di biaha a pidi asistencia policial.
Polis a presenta na e sitio y di biaha a cuminsa cu nan investigacion di kico tur a pasa. Despues di a tende version di ambos partido, a detene tanto e comerciante como e cliente. A pidi asistencia di transporte policial y transporta ambos partido pa Warda di Polis.
