Dialuna tabata un dia special p’e Praktijkondersteuners (POH), mirando cu nan a celebra 11 aña di existencia na Aruba. Segun Jasmira Mora, POH Coordinador di Wit Gele Kruis, pa nan e ta definitivamente algo pa para un rato keto, p’asina por mustra tur hende cu nan t’ey.
Ta profesional cu tin un balor agrega. Segun Mora, mayoria ta nurse cu ta specialisa den e ramo di diabetes y problema cardiovascular. Ta sinta en realidad na algun di e dokternan di cas. Lamentablemente no ta na tur dokter. E deseo ta si p’esey, pa den futuro dokter di cas por tin un POH y asina duna consulta n’e pashentnan cu tin problema di diabetes y tambe problema cardiovascular. Ta duna guia y informacion con pa hiba un estilo di bida mas saludabel.
E CANTIDAD
Actualmente tin 27 POH na Aruba. Tabatin mas den pasado, pero lamentablemente debi cu e curso no a continua y tambe debi n’e problema di COVID nan a bira menos hende eherciendo e trabao aki. Ta spera cu pa otro aña por sigui bek unda cu a keda y asina tin mas POH riba e isla, pa por acomoda tur dokter di cas cu un Praktijkondersteuner.
ROL DI WIT GELE KRUIS
E idea a cuminsa for di director di Wit Gele Kruis, Gino Goeloe, cu a mira esaki na Hulanda y el a trece esaki na Aruba. Hospital y AZV e tempo ey a ripara cu en berdad den di dos liña (hospital mas tanto) por mira cu hopi pashent ta drenta cu problema di diabetes.
