Por lo pronto Aruba no por introduci visa pa Venezolanonan cu kier bishita nosn isla. Esaki tabata un peticion cu Prome Minister Evelyn Wever Croes a haci, hunto cu su coleganan di Corsou y Sint Maarten, na Minister Hulandes, Stef Blok, encarganan cu Asuntonan Exterior, durante un encuentro cu a tuma luga na Sint Maarten.
Chris van Dam di CDA a haci un serie di pregunta na Minister Stef Blok riba e tema aki. Den e contestanan por lesa cu Minister Blok a informa e mandatario di Aruba pa sondea tur posibilidad cu por wordo haci na nivel nacional (local) y medidanan cu por wordo tuma prome cu yega na introduccion di visa pa Venezolanonan.
Na mesun momento Blok a informa e miembro di Tweede Kamer tambe cu Hulanda te ainda no a tuma un posicion riba e tema aki, pero tampoco por informa pa ki tempo esaki lo sosode. Si un di e paisnan di Reino entrega un peticion oficialmente, esaki lo wordo presenta na tur partnernan di Reino pa discuti y yega na un solo linea di maneho pa loke ta Relacionnan Exterior. “Mester evita cu ta introduci e visa pa un pais y e tin consecuencia pa e otro partnernan di Reino pa loke ta e trafico di Venezolanonan,” e mandatario Hulandes a bisa.
Manera ta conoci, dia 10 di mei ultimo, Prome Minister Wever Croes a anuncia cu Venezuela a tuma e decision pa habri frontera cu Aruba. Na mesun momentol, el a informa cu Gobierno di Aruba sinembargo a dicidi pa mantene e fronteranan cera pa un luna mas. E fecha aki ta vence den algun dia. Mientrastanto Venezolanonan ta sigui yega Areuba di forma ilegal, manera a sosode den oranan di madruga. Un total di dies Venezolano a trata di drenta Aruba di forma ilegal via costa pariba di Aruba.
