Den un conferencia di prensa dialuna mainta presidente di Sindicato di Maestronan di Aruba (SIMAR) Josephine Martilia a papia di e situacion cu e surgi siman pasa cerca un grupo di docente, ora cu nan no a haya pago di nan toelagen pero tampoco e “over-uren”.
A cana un proceso, unda mester a skirbi carta y duna deadline pa duna informacion, sigui pa negociacionnan pa haya e pago di biaha enbes di warda te cu fin di october. A negocia pa haya e pago mesora y a haya promesa di Minister di Enseñansa cu lo bay averigua kico a pasa y con lihe por haya e pago. Diahuebs atardi a haya un carta di DPS, cu e mesun pensamento.
Diabierna finalmente a logra haya e restitucion di e NPR (Pensioen) cu inhustamente a wordo kita for di nan. Pero e suma mas grandi cu ta relaciona cu “over-uren” y e toeslagnan no a haya ainda. Diabierna pero den oranan di atardi a haya otro carta di DPS unda ta informa SIMAR cu e pagonan di e docentenan lo drenta dialuna. Pa 12’or di merdia DPS a keda cla pa manda tur dato pa Finanza pa e pago por pasa despues di merdia ainda.
SIMAR ta contento cu DPS a duna oido na e reclamo husto di e docentenan y e esfuerso haci pa e drenta prome cu fin di october. Esaki lo kita e incertidumbre cerca e docentenan cu a drenta nan vacacion y tabata conta riba e suma di placa aki. SIMAR lo keda vigila cu tur cos bay manera e promesa haci door di DPS. Si tin docente keda cu problema, nan mester tuma contacto cu SIMAR.
No sa ainda unda of kico a bay fout y e mandatario a keda di averigua esaki ora e bolbe di su biahe. Normal cada scol mester manda e oranan aden y ora cu DPS a manda esnan di dje, algo a bay malo.
