E pueblo aki dia 22 di September a papia hopi cla, segun lider di partido POR, y proximo
minister di medio ambiente y infrastructura, Otmar Oduber. Tin tres partido cu a conoce no
solamente como partido nobo den e caso aki di POR, cu a conoce e dos asientonan y ta
duna reconocemento tambe na e sosten aki, pero tanto na partido MEP, tanto na partido
RED, caminda cu tres partido a sa di bay dilanti, a sa di gana e confiansa di e comunidad aki,
mientras cu e partido cu no a cumpli cu e confiansa cu pueblo a dun'e, a wordo rechasa.
No ta un casualidad cu e tres partidonan aki ta forma un Gobierno. E ta un mandato cu e
pueblo aki a manda den direccion di e tres partidonan y un responsabilidad cu nan mester
carga tambe y e responsabilidad y e sentido aki di e trabao duro cu mester wordo haci pa e
pais, a guia nan for di dia uno, despues di 22 di September, cu e prome contactonan a
cuminsa.
E no tabata facil. Nan a siña conoce otro, no por djis bisa cu semper a stima otro, pero un cos
si por bisa. Nan a siña respeta otro den e proceso cu a caba di pasa den e simannan tras di
lomba. Esey a duna e base di e siguransa pa comunidad di Aruba, cu aki ta trata di un
Gobierno no solamente solido, pero un Gobierno cu e pueblo di Aruba, comercio di Aruba, di
cada un di su ciudadanonan, por ta sigur y tin e confiansa cu ta bay ta un Gobierno di cuater
aña cu ta bay traha pa e aspecto humano, pa e aspecto di cada ciudadano cu ta biba riba e
pida baranca aki.
Oduber a expresa na Evelyn Wever-Croes, cu e sentido di orguyo di e prome dama cu ta bira
prome minister di e pais aki, ta yena tur. Como hende homber tambe, cu sentido di orguyo di
tin Evelyn Wever-Croes como minister. Den e fase aki, e respet ta loke a prevalece. Hopi
hende a cuestiona na caminda. Hopi hende no a kere of a anhela pa e dia aki no yega. Pero
ora cu kier traha algo bon, ora bo kier tin un siguridad pa comunidad di Aruba, di cu
naturalmente tin nan prioridadnan, nan necesidadnan na prome luga, bo ta tuma e tempo
necesario y e proceso cu a encamina for di e fase di informacion pa despues drenta den e
fase di formacion, te na e screening cu a tuma luga di tur e ministernan cu lo sinta den e
dianan aki, tabata uno riguroso, tabata uno cu pa duna e confiansa y siguridad na e
comunidad di Aruba. E 8 ministernan cu lo huramenta mañan, ta capacita pa goberna e pais
aki.
Oduber ta felicita e team negociador, pasobra nan a hiba un rol hopi importante den henter e
trayectoria aki, cuminsando naturalmente cu sr. Serge Mansur, sr. Robert Wernet, Nilki Kock,
como tambe den e caso aki Joselin Croes, kende un biaha mas ta dun'e e reconocemento di un persona cu a para pa un palabracion, pa un protocol, kende di biaha a accede, caminda mañan tambe lo tin huramentacion di tanto Marisol Lopez-Tromp como Alan Howell. Ta gradici tambe hopi habri su famia, casa, mama, tata, hendenan cu banda di un gran cantidad di hende cu tabata sostenedor di e partido. Otronan cu no a sostene e partido por ta e biaha aki, pero cu lo bay mira e trabao cu lo bay wordo haci door di e Gobierno aki, como un gobierno di 4 aña plus, cu lo bay sigura e pueblo aki, e bienestar general cu nan merece. E trabao cu ta wardanan ta uno fuerte. Esey por a mir'e den e prome documentonan cu nan por a haya, pero e realidad ta cu Aruba tin su Gobierno.
