Diadomingo atardi a inaugura e pista di Dragstrip Bonaire, unda cu ya caba e amantenan di fever a pone show. Un publico grandi tabata presente pa asina presencia e apertura, pero tambe pa mira e shownan di fever di tanto brommer como auto.
Jenny Martis ta un coredo di brommer di Corsou y a core n’e pistanan di Corsou, Aruba, Hulanda. Diadomingo el a haci fever riba e pista nobo di Boneiro. Martis a expresa cu na momento el a yega Boneiro e tabatin yen di emocion. Esaki ta bin pasobra hopi bes ta balota Boneiro y den un tempo cortico nan a haci algo.
Martis a expresa di ta contento cu e pista. Di mira con e diputadonan ta trahando pa Boneiro, e ta haya cu e otro paisnan por tin algo asina aki. E ta kere cu esaki lo yuda hopi cos riba caya, hopi cos negativo, drama riba caya, pero di tin un luga adecua pa nan haci loke nan gusta.
Said Felix, coredo di auto di Boneiro, a indica di ta contento cu e pista di Boneiro. E ta haya cu esaki ta algo cu nunca el a imagina cu e ta algo cu lo bira un realidad. Felix tabata e prome coredo di auto cu a habri e pista di e Dragstrip Bonaire. El a expresa di ta feliz, pasobra desde aña 2015 e ta un di e personanan cu a cuminsa bringa pa tin un pista. Na diferente ocasion el a bay afo sea como mecanico, como hurado, como ayudante, pero awo nan tin un luga unda nan mes por eherce nan deporte.
Flavio Maestroni, coredo di auto, tabata den e auto hunto cu Felix pa habri e pista. Maestroni a expresa di tabata un honor pa haci esey. E ta di pensamento cu esaki ta un stap grandi pa nan, grandi pa Boneiro, pasobra e ta un comienso pa nan. Awo nan por cuminsa hala atencion di e otro islanan, otro pais. Y por ta traha un competencia.
Pa mas lesa TREMPAN.COM.
