Dianan 11 y 12 di december, parlamentarionan di e paisnan den Caribe Hulandes tabata t’ey presente durante e di 30 hubileo di e mision duradero di comercio y congreso, den cuadro di celebracion di e 65 aña di Statuut.
Tema di e congreso aki tabata “Duurzaam zaken doen tussen het Caribisch Koninkrijk en Nederland”, organisa pa InterExpo.
Riba dia 11 di december tabata tin e apertura di e celebracion di 65 aña di e Statuut di Reino. Naturalmente Caribe Hulandes tambe a participa den esaki.
Como kick-off InterExpo a organisa un reunion di dos dia na Hotel Des Indes na Den Haag, Hulanda, caminda cu tabata tin por lo menos 15 orador invita di Reino.
Tambe durante di e dianan aki tabata tin Matchmaking: cu e meta pa cera conoci cu un empresa of partido cu ta relevante pa e organisacionnan presente.
Entre otro tabata invita e delegacion di e gobiernonan insular y for di Hulanda. Tambe CEO di varios empresa, como tambe inversionistanan for di Reino Hulandes. Representantenan di e sector financiero manera banco, trustkantoor, abogacia y notariado.
Representantenan di Aruba
Un di e invitadonan pa e conferencia aki tabata Marlon Sneek, lider di fraccion di AVP, kende a splica un tiki di e conferencia aki. Pa nan como parlamento esaki ta hopi importante, pasobra ta mira cu tin otro hendenan cu tin un bista con e Statuut mester ta.
Con e reglanan cu ta rigi e comunicacion entre e islanan den Reino, of en todo caso e paisnan den Reino con e mester ta. Bo por mira cu tin hende cu tin bista di loke ta con e mester sigui.
Entre otro tin ta bisa cu por ta mester ta los for di otro. Ta haya otronan cu ta bisa cu hustamente cu e ta bon y pa mira con pa sigui duna mas espacio na cada un di e islanan den e caso aki, specificamente den Reino pa tin e oportunidad pa por sigui desaroya.
E ta importante pa para keto na esaki sigur ora cu ta mira cu for di e banda aki tin hende cu toch ta kere cu Reino ta algo positivo, Reino ta algo cu mester sigui duna contenido na dje.
Pa Sneek e tabata sigur un programa balansa, caminda cu tabata tin oradornan cu diferente pensamento, pero tambe loke e ta sinti cu a sobresali, ta e oradornan cu toch ta kere cu Reino mester keda manera cu e ta na e momentonan aki.
Marisol Lopez-Tromp
Parlamentario Marisol Lopez-Tromp, kende husto a celebra su 22 aña den politica, tabata den panel pa e topiconan ya menciona.
E 65 aña di Statuut, cu 22 aña e tabata envolvi den politica formando parti di e comisionnan interparlamentario, unda cu Aruba, Corsou, e tempo ey cu e resto di e islanan hunto cu Hulanda y despues cu cada un a bira pais, por bisa cu e prome 15 añanan tabata tin discusionnan fuerte.
E reunionnan tabata bay riba structura estatal. Hopi discusion riba statuut, con ta interpret’e. Puntonan cu lo ta na beneficio di e islanan den Caribe. Y te cu awe tin di nan. Sinembargo den transcurso di aña a dicidi den e comision aki pa fiha riba loke ta uni e paisnan, en bes di loke ta dividi e paisnan.
Ta reuni riba e mesun topiconan manera Geschillenregeing ta un di nan. Pero ta wak tambe e topiconan cu por traha hunto den Reino.
Tanten cu e Statuut ta manera e ta, ta mara na otro, mescos ora cu un pareha ta casa. Den cuadro di esaki, hopi pregunta y discusion tin cu si tin cu sigui cu Statuut, si tin cu aboli esaki of tin cu kit’e.
Pero e realidad cu tin awor aki ta pone cu na e momentonan aki, ta busca cooperacion na luga di division, segun Marisol Lopez-Tromp.
Corsou presente
Minister Camelia Romer a comenta cu ta bon pa para keto riba e ley constitucional mas halto cu ta mara e islanan na otro, plus Hulanda na nos. Pa por refleha riba e ley mes, pero tambe riba futuro di unda bo kier bay cu e reinado aki.
Fuera di esey, e mandatario di Corsou a menciona cu mescos cu na Corsou y Aruba e hendenan ta pensa diferente, na Hulanda tambe. Por mira di esnan cu ta di un scol academico, tur ta realisa cu e areglo di disputa cu ta riba mesa, no ta bon, cu mester kit’e fo’i mesa.
Nan ta papia mas profundo riba e statuut y e puntonan cu mester refleha riba dje y ta mira cu e parti politico manera semper tin distincion. E persona di D66 ta pensa mas riba espacio tambe pa politiconan di e islanan y ta mira cu di VVD, tin menos espacio, cu kier mas dicta y para riba cu mester evalua awor aki, aunke cu bis’e cu e problemanan cu nos paisnan tin, economico, financiero y socialmente ta exigi cu nos atencion por lo pronto ta riba locual ta mishi lo mas cerca di pueblo y no tanto riba discusionnan constitucional.
Corsou tabata bon representa durante di e evento aki. Tabata tin hende di St. Eustatius tambe. E ta bon pa e netwerk, pero loke cu e ta bon tambe durante e dos dianan aki di presentacionnan varia y debate intensivo ta cu tur hende cu ta traha cu e materia di acerca, tin oportunidad un rato pa discuti riba e puntonan fundamental den e statuut cu ta importante.
Varios comentario
E evento riba su mes a bay hopi bon. Segun comentario di esnan presente dos aña pasa nan a tene un evento similar y mayoria di e oradornan tambe tabata t’ey presente. E evento aki a wordo organisa den cuadro di 65 aña di Statuut, mirando cu dia 15 di december tabata e di 65 aña firma e statuut pa Reino.
Ta bon pa acerca for di diferente angulo pa papia riba dje. Tabata tin hopi bon orador. Tabata tin miembronan di Tweede Kamer di diferente partido. Tabata tin Hooggeleerden. Tambe tabata tin hendenan di Corsou, entre otro for di minister te cu parlamentario.
Tambe tabata tin delegacion di Aruba, caminda cu e presidente di parlamento tabata un di e oradornan y tambe miembronan di parlamento.
Ta bo pa como partner pa comparti pensamento y bin hunto pa iniciativanan di bon discucion pasobra tur hende kier e mesun cos. E bienestar di nan pueblonan. Tur ta bringa pa un meta similar.
A boga pa haci esaki por medio di bin cu discusionnan y pa haci esaki mira otro den cara di otro y bisa otro kico ta haya di e asunto.
Tambe a invita varios otro organisacion manera Cruz Cora riba e asunto di refugiadonan.
Tur esnan presente tabata entusiasta y ta spera cu e partnernan dentro di Reino a saca fruto di e dos dianan aki.
