Ivo Valdes, Presidente di OPPA ta bisa cu na Aruba tin un tendencia cu hende grandi ja no tin nada mas di bisa. “Y riba dje nos ta practicando edadismo, cual ta un discriminacion contra hende grandi pa e simpel hecho cu el a bira grandi den edad.”
Durante e Foro Nacional pa Adulto Mayor cu a tuma luga e siman cu a pasa na Hilton Aruba, nos a haya e oportunidad pa combersa cu Valdes riba e tema aki, kende ta agrega cu por mira hopi di e discriminacion aki den trafico por ehempel. Un automobilista ta topa cu un otro coriendo poco poco riba caretera pasobra su mobilidad a bira menos. “Kico nos ta bisa? E persona grandi a stroba mi riba caminda. Of un yiu cu ta papia di su mayornan, e kier hink’e den por ehempel un cas di cuido, pero e persona no ta di acuerdo, anto nan no ta tene cuenta cu su opinion.”
