Dia 7 di augustus 2023 Egmond Molina ranca un bus di diesun ton p’un distancia di binti meter. El a logra esaki den un tempo di 33.32 seconde, cual ta un tempo lihe. Cu e tempo ey, a pone su nomber den e buki di Guinness World Record pa di cuater bes. Awo, oficialmente el a ricibi e certificado, cu ta e comprobante necesario cu e mester. E certificado aki ta indica cu un biaha mas e ta den e buki di Guinness World Record.
Prome biaha e no a logra e obhetivo y esey a pone cu e mester a hacie un di dos bes. E prome bes algo a bay robes y esey a strob’e. Pero cu mente dicidido el a logra e di dos bes.
Den un entrevista cu Egmond Molina, deportista, el a indica cu e ta buscando e di cuater record pa Aruba ta den Guinness World door di ranca un bus di diesun ton cu un dede, di cual el a haci. E preparacion pa por a haci esey tabata uno largo.
E tin tres record caba na su nomber. E ta gradicido na Dios pa dun’e e don den su man cu e por a ranca e bus, tambe sin lubida tur cu a yud’e realisa su meta. Molina a cuminsa haci e recordnan aki despues cu su mama a fayece, el a dicidi pa pone Aruba su nomber mundialmente. Esaki ta pa sa cu Aruba tin talento den tur deporte.
