E operacion di yudansa di emergencia na Haiti a clausura. E envolvimento di Defensa tabata pa diescuater dia y a inicia dia 20 di augustus. Gobierno Hulandes a dicidi pa desplega militar Hulandes, despues di un peticion pa yudansa di parti di e gobierno di Haiti. Dia 14 di augustus un temblor pisa a asota Haiti, cobrando bida di varios victima y tambe ocaciona hopi destruccion na e infrastructura. Hulanda tabata un di e paisnan cu a dicidi di manda ayudo (militar) di emergencia inmediatamente.
E barco di Marina Hulandes Zr. Ms. Holland, cu 99 militar abordo, un helicopter y algun boto di motor rapido, a cuminsa nan curso dia 20 di augustus pa Haiti. E participacion Hulandes a tuma luga dentro di un mision di ayudo di emergencia humanitario di e Nacionnan Uni. E organisacionnan di ayudo di emergencia presente na Port-au-Prince (entre otro Cruz Cora y UNOCHA) a coordina e necesidadnan di ayudo den e zona di desaster. For di esaki a sigui tarea concreto pa e barco di Marina.
Awa, articulo medico y pakete familiar
Asina Zr.Ms. Holland a ehecuta diferente mision di reconocemento cu helicopter y FRISC, pa haya un miho bista di e daño y e necesidadnan di yudansa. E barco di di patruya a sostene cu logistica, moviendo personal y material di A pa B. Hopi caminda ta destrui door di e temblor, ademas tin hopi insiguridad pa loke ta trata actividad criminal. Pa es motibo e transporte a tuma luga via aereo of maritimo. Por ehempel, pa bay Les Cayes. Fuera di esaki Zr.Ms.Holland a descarga suministrio di emergencia na varios luga. Entre otro na Aquin, Anse-á-veau, Baradéres y Miragoâne. A entrega specialmente awa, material medico y pakete familiar.
Ayudo di emergencia pa yega na reconstruccion
“Yudansa humanitario di emergencia ta un otro tarea central, importante y gradecido di Defensa”, segun e capitan teniente maritime Harald van Rin, comandante di Zr.Ms. Holland. “Nos por involucre nos mes pa yuda hende den necesidad. Mi tripulacion, e militarnan cu a bin abordo specialmente pa e mision aki, mi ta wak patras cu satisfaccion riba nos participacion na y riba pais Haiti”.
Tambe despues cu Zr.Ms. Holland a biaha bek pa cas, Hulanda lo permanece envolvi den e ayudo di emergencia humanitario na Haiti, caminda e paso di yudansa di emergencia ya ta tuma y despues lo bay over na reconstruccion. Pa e reconstruccion ey si ya no tin un rol mas pa e militarnan Hulandes.
Orguyoso
Minister di defensa demisionario Ank Bijleveld a expresa palabra di aprecio pa e militarnan involucre: “Pa dos siman largo Defensa a brinda ayudo na e Haitianonan den necesidad. Orguyoso di nos coleganan cu a hinca nan schouder bou di esaki tur cu tin”. Zr. Ms. Holland lo drenta Corsou bek diabierna.
