Ta despues di un aña cu un grupo di musico, dj y entertainers a uni p’asina bringa pa nan derecho den temporada di pandemia. E grupo a yama nan mes Aruba Entertainment 2020 y porfin ta un organisacion oficial.
Na varios ocasion nan a delibera cu CrisisTeam riba ki forma nan por traha, mirando cu e mundo di entretenimento tabata un di esunnan mas afecta.
Awe, porfin a firma e acta oficial na notario Helmeyer. Ofo Escudero a hiba palabra durante e conferencia. El a conta cu nan ta hopi contento cu porfin nan a firma e acta aki. Awo e organisacion ta conta cu un presidente, vice-presidente, secretario, tesorero y demas miembronan.
Tin miembro cu dj, musico y hasta tin algun cu tin conocemento di ley. Escudero a elabora tambe riba e ultimo decision di CrisisTeam, di cual un biaha mas ta bay na solamente un musico por presenta. A tuma e decision sin dialoga cu Aruba Entertainment 2020. Esaki ta algo cu nan ta lamenta profundamente. Pa awo tur musico, dj, y tur cu ta biba di e mundo di entretenimento por conta cu un organisacion cu ta traha duro pa por bringa pa nan derecho.