Na Cas Ceremonial di Gobernador e ocho parlamentarionan cu mester a drenta na luga di esunnan cu a entrega retiro pa bira minister. Nan a huramenta dilanti di Gobernador Interino, Su Excelencia Yvonne Lacle-Dirksz.
E ocho parlamentarionan cu a huramenta di MEP ta Alvin Molina, Louisette ‘Setty’ Yarzagaray, Shailiny Tromp-Lee, mr. Juan ‘Ady’ Thijsen, Marco Berlis y Darlaine Guedez-Erasmus. E parlamentarionan di RAIZ cu a huramenta ta Raymicheline ‘Mishe’ Raymond y Raymond Kamperveen.
Durante e huramentacion famia di cada parlamentario no por tabata presente, pero despues tur a sali direccion parlamento pa topa cu nan. E parlamentarionan nobo ta cla pa haci nan trabou.
Parlamentario Raymicheline ‘Misha’ Raymond tabata contento di por a huramenta y e trabou oficial ta bay cuminsa. Raymond ta bira e lider di Fraccion RAIZ. Loke por spera di dje como parlamentario ta cu e lo ta hopi critico y analitico pa mira unda kier hiba Aruba dilanti. Tambe kico tin mester di haci pa logra esey. Pa su persona no tin diferencia, pasobra gobierno ta gobierno y nan tin di bay haci nan trabou awo.
Louisette ‘Setty’ Yarzagaray un biaha mas ta den parlamento y e ta gusta bay riba estadistica, ‘facts’. E ta di pensamento cu esey no cambia hopi, pero ta kere den reestablece bek confiansa den parlamento. E parlamentario a referi n’e parti mas real, menos e parti di sensacion y na final di dia e ta yuda cu desaroyo dje pais n’e momentonan no facil.
Lider di Fraccion MEP, Shaylini Tromp-Lee, tabata emociona di ta un biaha mas den parlamento. “Semper ta un honor di forma parti di e organo di mas halto di e pais akinan”, el a expresa. Esey ta loke nan a caba di haci un realidad cu e huramentacion. El a splica cu a bay parlamento pa aproba credencial dje ministernan.
Marco Berlis a bira parlamentario di MEP pa prome biaha y di traha den parlamento ta un privilegio. E tin intencion di traha duro c’un vision y curason pa pusha Aruba padilanti. Su intencion ta pa derama su curason y intencion pa Aruba bay dilanti, y trece cambio den parlamento pa nan traha hunto. Di forma parti di parlamento esaki tabata su deseo. E lo kier enfoca riba diferente area, pero specialmente esun di social como husticia.
Alvin Molina ta contento di a huramenta como parlamentario y ta un placer pa sirbi comunidad di Aruba dje manera aki. E motibo mas di importante cu el a tuma e paso aki tabata pa su coleganan di Cuerpo Policial. E parlamentario ta mira e desaroyo necesario pa Cuerpo Policial, pero tur departamento cu tin di haber cu husticia. Asina por sigura un siguridad mas halto pa Aruba cu ta importante pa tur hende.
Juan ‘Ady’ Thijsen tabata presidente di parlamento durante e gobernacion di Gabinete Wever-Croes I. Y pa su persona di a huramenta un biaha mas como parlamentario ta un privilegio y honor pa representa pueblo. El a haci e trabou den parlamento como lider di fraccion, presidente di parlamento y como parlamentario. E t’ey un biaha mas pa duna su sosten na e generacion nobo. Pa futuro semper lo keda si e lo tuma otro opcion of funcion, pero ta orguyoso di ta parlamentario.
