Empleadonan di nos compania nacional di distribucion di coriente, NV Elmar, a cende nan pagara tradicional diabierna atardi pa cera e aña aki. A tira un pagara di 1 miyon tiro dilanti e oficina principal di NV Elmar situa den Wilhelminastraat. A scoge e empleado Cedrick Wever, swa di Minister Presidente, pa cende e pagara y asina dispidi di aña 2018.
E aña a bay cu hopi contratiempo, specialmente riba tereno sindical, bou di empleadonan y den gerencia. E aña aki gerencia tabata den discusion constante cu sindicato STA, cu dado momento a exigi cabes di e Director. Dado momento a descubri un fraude grandi eyden, a suspende dos trahado cu a habri un “shap den mi shap” den NV Elmar.
Consecuentemente, e Hunta di supervision ainda no kier tuma un decision cu e dos trahadonan, pero si a yega na un acuerdo pa duna e Director un “golden handshake” pa e bay.
Na su luga a nombra Tico Koolman, yerno di ex Director Freddy Wever, cu awor ta na timon di e compania. E tabatin hopi ańa caba trahando eyden y sa hopi di aspectonan tecnico den NV Elmar.
Pero ta parce cu den e compania, problemanan nunca ta caba. A resulta cu un grupo di trahado a bay keha na e ehecutivo di Recurso Humano (HR), esta Zelda Curiel (yiu muhe di ex Director di Utilities Aruba, esta Juchi Curiel), cu nan ta sinti nan mes menasa y intimida dor di dos supervisor. Un di nan ta Alcide Koolman-Wever, yiu muhe di ex Director di Elmar, Freddy Wever y cu ta casa di e Director actual. Parce cu ta intimida e trahadonan cu si no haci loke e Gobierno nobo ta dicta, cu lo kita nan for di trabou.
Curiel, siendo e HR Manager di NV Elmar, a traha un rapport y a mande pa gerencia. Ora cu e Director actual a mira cu e keho ta contra su mesun casa, a exigi di Curiel pa e menciona nomber di tur e trahadonan cu a keha Alcide Wever. Ora e ultimo aki a nenga, nan a suspende di trabou mesora.
Zelda Curiel awor a pone su caso den man di abogado mr. Doris Canwood, cu ta evaluando entama un caso sumario contra gerencia di NV Elmar pa persecucion. Como tal, ta parce cu aña nobo lo habri e director actual cu basta reto pa surpasa, specialmente pasobra “politicamente” tur e partidonan envolvi ta di e mesun “banda” y ta percurando pa un ambiente no agradabel na pia di trabou.
