Instituto Pedagogico Arubano (IPA) a reuni cu formado di e proximo gobernacion. A sinta splica e formado riba IPA y cu nan no por dicidi pa bin c’un opleiding nobo. A splica cu tin di tene cuenta cu cierto aspecto.
Durante e conferencia di prensa, Marilyn Richardson, director general di IPA a splica cu e proceso pa trece mas opleiding na Aruba ta uno dinamico y extenso. Pues mester tene na cuenta e necesidadnan cu tin, entre otro, riba e mercado laboral, y tambe di ki forma por cumpli cu e necesidad ey sin duna demasiado pa no crea desempleo bou di e maestronan.
Banda di esaki, tin e aspecto di profesionalisacion, esta recapacitacion di e maestronan actual cu ta un parti crucial cu IPA ta bezig cu ne. Marisol Croes, director di profesionalisacion, a splica cu tin plan strategico ora ta trata di e posibilidad pa un opleiding nobo.
Tambe Croes a bisa tambe cu mester tin un base legitimo paso nan ta trahando cu placa di pueblo di Aruba. “Pa cuminsa cualkier opleiding nobo, tin un trayectoria caminda mester demostra cu e persona cu bo ta bay leid op ta bay haya empleo y cu e ta hancra den ley vigente na Aruba”.
Pa loke ta trata e interes pa cu e opleiding di bira docente, ta ripara cu tin interes ainda, tin hopi aplicacion pero e problema ta sinta na e nivel di capacidad di e aplicantenan. Segun Richardson “No ta tur cu aplica ta logra drenta e opleiding”.
Pa cobertura mas amplio lesa e edicion di TREMPAN mañan.
