Ultimo dianan tabatin hopi speculacion relaciona cu coronavirus y personanan infecta cu esaki. Aruba tin un canal oficial, unda ta registra tur dato.
E motibo di esaki ta cu instancianan internacional cu cual Aruba tin cooperacion ta exigi esaki. No por gaña pa motibo cu tin demasiado hende envolvi den e procedura.
E siman aki a cuminsa cu basta speculacion riba e victimanan y nan edad. Un di e speculacionnan cu a cuminsa for di dialuna ta cu tin 4 of 5 cinco persona di bou di 18 aña interna den hospital cu Covid. E hendenan di e forma aki tin biaha inocentemente kier mustra riba e seriedad di e situacion. Pero lamentablemente e informacion aki e ora ta bini di loke ta bisa ta “horen zeggen”.
Tin casonan cu personanan ta sigui loke otro ta bisa y ta tum’e como algo oficial siendo cu nunca e informacion tabata confirma pa un instancia oficial. E Team di 24ora.com tambe a tuma nota di e diferente postnan riba Facebook y hendenan cu ta yama bisa cu tin 5 hoben den hospital. Despues cu Prome Minister Wever Croes a informa den un conferencia di prensa riba e cantidad di pashentnan, a haya diferente comentario un biaha mas. A tuma contacto cu vocero di Departamento di Salud Publico Jurette Croes, kende a desmenti categoricamente cu tin muchanan hoben interna.
Segun e relacionista Publico di DVG, te cu diamars e pashent di mas hoben cu Covid-19 y interna pa esaki na hospital tin 28 aña di edad.
Esaki ta demostra cu hopi biaha un rumor ta crea su propio bida, si no cort’e na su reis. Esaki a sosode ayera tambe cu un persona cu a fayece di Covid-19 den oranan laat di atardi pa anochi. Pa un of otro motibo, personanan a conecta esaki cu un otro persona cu a fayece mas tempran den dia. Niun momento DVG a identifica e persona, ya cu esey no ta nan forma di proceder, esta di duna nomber. Pero tampoco a señala ningun momento den direccion di e persona cu a fayece. Simplemente tin hende den comunidad a saca nan conclusion y dunando mas dolor na famianan y cu a causa henter un consternacion riba Facebook.
