Awe nochi a tuma luga sorteo di Fundacion Lotto pa Deporte. Niun persona a gana Lotto 5 y p’esey e premio grandi a bira 2 miyon florin y esaki ta di dos biaha cu a yega n’e suma cuantioso aki. E numbernan cu a sali tabata 01, 02, 04, 18, 27 Joker 15 y letter L.
Lotto pa Deporte a informa mesora cu e siguiente sorteo di Lotto 5 lo ta diasabra awo dia 9 di october 2021 y cada lotto ta costa solamente cuater florin. E jackpot a bira 1.950.000, pero Fundacion Lotto pa Deporte a dicidi di hacie bira Afl. 2.000.000,=, mester tin e cinco numbernan corecto.
Cu e suma aki, ta ripiti historia, ya cu na 2015 Lotto 5 a yega 2 miyon florin y awo a hisa esaki na mesun suma cuantioso. Tradicionalmente e premio ta crece masha pocopoco debi cu e no tin e factor di paga extra pa hisa e premio manera Mini Mega (Plus) si tin.
Ta bon pa resalta cu entre aña 2012 pa 2020, Lotto a paga mas di 200 miyon florin na premio entre su hungadonan cu a gana cu e weganan di Lotto. E record di Lotto 5 tabata for di aña 2018, ora e premio grandi a crece te alcansa Afl. 1.650.000,=. Rolando “Grandi” Mèdonnè a gana e premio ey dia 27 di januari 2018 na Nasett Lottery den Bernhardstraat, na San Nicolas. E tempo ey el a cab’i perde trabou y e mesun siman a gana e premio record y a bira ‘miyonario’.
Lotto, e loteria di Aruba ta existi desde 1982 y tin diferente wega; Catochi, Big 4, 1-OFF, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e weganan di Raspa y Gana. E fundacion a sa di crece benta di e productonan durante e ultimo añanan te alcansa un record na 2017 di 50 miyon florin! Cumprando Lotto bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
