Aleluya! Matrimonio ta algo hopi bunita, precioso, pasobra ta Dios mes a institui matrimonio entre un homber , un muhe y Dios pa nan bira un solo carni, multiplica y yena mundo.
Awendia mescos cu hende ta papia di pilar di economia, matrimonio ta e pilar social. Matrimonio ta e fundeshi di norma y balor pa famia. Matrimonio ta comienso di famia y un sosten unico pa sociedad, den cual nos por mira amor y respet un pa otro, den cual tambe futuro generacion por tin goso di e matrimonio di nan grandinan.
Stabilidad matrimonial ta e yabi pa tur famia. Dios bendiciona tur matrimonio, caminda fieldad ta reina, pasobra nos Dios ta fiel y e ta para na banda di hende fiel.
Matrimonio ta un diamante, cual su balor Dios a ancra den su Reino, pasobra Dios a bisa cu locual El a uni no laga ningun hende separa.
Materialismo, placa, paranda, bicio y mas cu tur cos infieldad, ta enemigo cu ta presenta constantemente dilanti di matrimonio y ta laga hopi herida atras den famia y nos comunidad.
Ta deseo di Dios pa tanto hende homber como hende muhe den matrimonio keda fiel na otro, pasobra infieldad ta trece falta di respet, tanto pa pareha como pa yiunan. E ta trece rabia y odio, violencia y nos ta mira tambe cu vengansa tambe ta agrega den e asunto, pasobra tin hopi falta di pordon.
Ta bon pa nos tene cuenta cu ora un persona cay den infieldad matrimonial, e ta mustra na prome bofon di Dios y gran bofon di su pareha.
Ora un hende ta casa, hopi biaha deseonan ta bini na bo mente y si bo no aleha of bo no sa con pa aleha, e deseo ta busca moda di bira realidad. Pero bo tabata sa cu deseo ta pica y cu bo tin pidi Dios aparta e deseo ey for di bo?
Mundo ta yena cu tentacion, pero e palabra di Dios ta bisa di esun cu ta causa tentacion, pasobra tin hende kier kibra bida matrimonial di otro djis pa maldad of envidia. Nos mester tene bon cuenta cu esey.
Den e buki di Hebreonan Capitulo 13 vers 4 ta bisa: Laga matrimonio wordo honra pa tur hende y laga e cama matrimonial ta sin mancha, pasobra Dios lo husga fornicador y adulteronan.
Nos mester trece matrimonio na su luga di respet bek, pasobra locual Dios a institui entre homber y muhe. Dios a dun’e su respet, p’esey tur hende cu atenta contra matrimonio tin di arepenti, pidi Dios pordon y drecha nan asunto.
Matrimonio ta un creacion social di Dios forma riba e di seis dia den e siman di creacion di mundo (Genesis 1 vers 27+28) pa asina trece multiplicacion di hende riba mundo.
Cada biaha cu un matrimonio kibra ta un sla social duro y hopi biaha e ta bira un dolor despues pa e muchanan cu di un of otro forma no por gosa mas di e union di nan mayornan.
Tur deseo pafo di matrimonio no ta di Dios. Dios no ta kibra ningun matrimonio cu e mes a establece. Hopi biaha hende ta uza materialismo y sensualidad pa forsa un divorcio y pone e palabra di Dios un banda.
Dios ta duna tur esunnan cu por a cay den e trampa di adulterio un oportunidad pa sali afo den 1 Corintionan Capitulo 6 vers 9+10+11. No lubida riba Efesionan 5 :28.
Sinceramente,
Pastoor Marcel Balootje
