Tur esten cu e procedura di retiro ta canando na labor, e trahadonan di Tony Roma’s ta keda den servicio, segun director di departamento di labor, Nick Kock.
Ya diaranson, nan mester a wordo paga, ya cu nan ta cobra pa kincena. Nan no a wordo kita ainda. E decision di e dunado di trabao pa cera e negoshi, ta cay pa su risico. E trahadonan ta den su servicio ainda. E tin cu gewoon keda paga nan. Si el a cera su luga y no tin trabao pa nan, e percura pa nan haya trabao otro caminda. Pero si e no por esey, e tin cu keda paga nan. Nan ta den su servicio ainda. Nan tin tur derecho y beneficio prome cu e peticion aki a tuma luga.
Kock ta sigui splica cu si yega asina leu cu nan yeg na acuerdonan mutuo prome cu duna e permiso pa kita e empleadonan, cual no ta ni sigur lo bay duna e permiso pa kita trahado, mirando cu tin hopi pregunta cu tin cu wordo contesta, na un forma satisfactorio, departamento di labor lo stress pa haci’e si segun leynan laboral pa loke ta pago. E ora na cesantia, cual ta e parti di mas grandi di pago cu un trahado por haya, pio si e tin hopi aña di servicio, ley ta perscribi cu den e prome 10 añanan di su servicio, pa cada aña di servicio, e tin derecho di un siman di cesantia. 11 aña den servicio, te cu 20 aña di servicio, pa cada aña, e tin derecho tin 1.25 siman di sueldo na cesantia y di 21 aña p’ariba, pa cada aña e tin 2 siman di cesantia. Hendenan cu hopi aña di servicio ta acumula hopi derecho riba cesantia. Na Tony Roma’s tin hopi hende cu hopi aña di servicio.
Esey en todo caso, si yega na acuerdo mutuo mes, lo stress pa nan paga nan segun ley ta perscribi. Pero labor mes lo prefera a lo menos cu nan bin cu paketenan cu ta hopi atractivo. Labor mes ta prefera pa warda e procesonan aki termina pa haci tur investigacion posibel y pa asina tuma un decision. No mester lubida cu si durante e proceso aki no yega na ningun acuerdo mutuo y na final dicidi cu nan no ta haya e permiso di retiro, e trahadonan ainda lo ta den servicio. Nan tin cu sigui paga nan of duna nan trabao otro caminda. E trahadonan den e caso aki ta bon proteha. Si bin resulta cu e luga aki ta cera y bin un otro negoshi, en principio e negoshi nobo mester tuma nan den servicio.
Dialuna a papia cu e trahadonan so pero awe diamars, tin pensa di papia cu e representante di e doñonan na Aruba. Aki lo bay splik’e con leynan ta hinca den otro, segun Nick Kock. Por ta hopi hende no sa con e leynan ta hinca den otro tampoco.
