Despues di dos aña cu no por a celebra Carnaval debi n’e pandemia di COVID-19, aña 2023 un biaha mas e pueblo di Aruba por celebra esaki atrobe. Diasabra awo lo tin Parada di Flambeu, conoci como Fakkeloptocht pa Carnaval 69.
Pa e gruponan di Carnaval como tambe e bandanan musical, e trabounan a cuminsa caba pa asina por pone ambiente riba caya diasabra awo. Nos di 24ora.com a combersa cu un di e lidernan di banda, Ofo Escudero, den e caso aki lider di e banda ‘NFuzion, cu ta e houseband di TOB Carnival Group. El a indica cu e trabounan ya caba ta den ful swing pa asina prepara e truck, prepara zonido pa diasabra awo.
Segun Escudero, despues di un temporada druk di fin di aña, ya caba e energia ta ful na halto, p’asina nan por cuminsa celebra Carnaval hunto cu e pueblo di Aruba.
Ya caba e truck ta biniendo cla, pa loke ta adorno, preparacion, e instrumentnan y tambe prepara pa instala e ekipo di zonido.
‘NFUZION
‘NFuzion a cuminsa na 2013 y for di 2014 ya caba nan tabata riba caminda, cu excepcion cu e dos añanan cu no tabata tin carnaval, na varios ocasion nan a sali banda di aña y semper nan a zorg pa nan por ricibi un variacion completo di musica. Segun Escudero, esaki no ta solamente pa esunnan cu ta den e grupo, pero tambe pa esunnan para na banda, cu ta bin gosa y baila riba e ritmonan di N-Fuzion.
KICO E PUEBLO POR SPERA DI ‘NFUZION P’E TEMPORADA DI CARNAVAL
Semper ‘NFuzion a purba di duna e publico carnavalesco algo diferente di e aña anterior. Semper nan a purba di cumpli cu loke nan ta spera di e banda. E aña aki, Escudero a indica, Denzel Browne, miho conoci como Kulchaman, lo ta hunto cu ‘NFuzion e aña aki.
Tambe Escudero a splica un poco di e sorpresanan cu nan ta bay tin p’e publico Carnavalesco, unda cu el a indica cu nan bin cu innovacion pa nan publico, door di bin cu premio y sorpresa. Un di e innovacion di e aña aki ta di bin c’un QR-code, cual nan ta haci lo posibel pa nan keda cla pa fakkel.
N’e publico Carnavalesco, ‘NFuzion ta bisa: “Prepara”! Nan ta bin carga cu ambiente y hopi musica!
