Tabata apenas algun minuut prome cu toque de queda ora un accidente a tuma luga riba Green Corridor. Ta un poco mas pariba di brug Fredis Refunjol e sucedido a tuma luga.
Segun informacion, e auto tabata biniendo for di Pos Chikito direccion Playa. Pa un motibo of otro a perde control y bay kentel. Segun testigonan, el a bolter como dos pa tres biaha. E prome biaha ora di crusa band’i caminda y djey algun buelta mas pa bay termina net parib’i e stacion di bus.
E auto ta marca Mitsubishi numera A-6046 color scur. E chauffeur a resulta seriamente herida. Testigonan a hay’e boca abou tira riba caminda. Un rato despues paramediconan a presenta pa cuminsa brind’e atencion medico. Polis a cera rotonde di Drive In y tambe esun di Pos Chikito.
Ambulance a transporta e victima pa hospital p’e ricibi atencion medico avansa. Polis di trafico a presenta pa atende cu e accidente, a nota cu hasta e hefe di e departamento menciona tabata na sitio.
