Diahuebs anochi den un evento memorabel na Boulevard Events Aruba, hunto cu famia y conocir a tuma luga e firmamento di e hoben prospecto Rubiano Nathan Arends. Oficialmente el a firma su contract profesional cu e organisacion di Major League Baseball, Oakland Athletics.
E ceremonia di firma a conta cu presencia special di Director di Scouting di Oakland Athletics, Steve Sharpe, su agente Jose Fortuna di Fortuna Training Facility na Florida, su mayornan Nathalie Croes y tata Arie Arends. Nathan Arends a demostra su habilidad y potencial riba monticulo di baseball captando asina e atencion di diferente scout di diferente organisacion di Grandes Ligas.
Su caminda for di un talento local pa un atleta profesional ta un testament di su trabou duro, dedicacion, y e apoyo constante di su famia.
Den e proximo simannan Nathan Arends lo sali pa Republica Dominicana unda lo e establece su mes y cuminsa cu e preparacionnan pa e “Dominican Summer League” hunto cu e organisacion di Oakland Athletics.
