Diasabra y Diadomingo, Aruba tabata bon representa na Coral Springs Aquatic Complex na Coral Springs Florida. Ta trata aki di e competencia ‘Worldwide Invitational Coral Springs Florida den e deporte di natacion artistico. Natacion artistico ta e deporte cu mayoria hende conoce como landamento sincronisa.
Josslyn Velazquez y Ninziah Alexander ta dos di e atletanan cu a participa den e ‘Worldwide Invitational Competition’ na Coral Springs, Florida cu a conta un poco di nan experiencia den e competencia aki. Josslyn a conta cu e tabata hopi nervio, pero cu el a calma y tabata bisa su mes, cu si e por haci un bon papel, cual el a logra tambe.
Ninziah tambe a participa den e competencia aki y tambe a sinti cu nervio tabata domin’e te cu el a cuminsa yora. Pero Josslyn a bin papia cu ne y esey a haci cu el a calma. Tur hende a apoy’e y a bis’e cu el a haci un bon trabou, cual a haci cu el a sinti su mes bon tambe.
Ninziah ta conta cu semper el a gusta e deporte aki. Tempo cu e tabata bay zwemles hopi biaha e tabata bay bou di awa y ta duik bay n’e otro banda. Door cu e tin bon dominio di su rosea el a puntra su mama over di waterballet y ora cu su mama a splic’e di e sport, el a pidi su mama pa a bay haci e deporte aki.
MAKE UP Y CABEY
Ninziah a conta cu nan make up y nan cabey, cu nan make up ta waterproof y e mester ta ‘bright’. E gel den cabey ta pa nan cabey no los ora cu nan bay den awa.
Josslyn a splica cu e ta gusta e sport y su meta ta pa un dia yega e Weganan Olimpico. E ta un sport cu mester dedica hopi tempo na dje. E mes ta train casi tur dia y pa esaki ta disciplina ta loke mester mas di dje.
Pa Josslyn, natacion sincronisa no ta pa tur hende, pero mas bien cu e hende mester por gusta e deporte y tambe mester tin hopi dedicacion.
Tanto Josslyn como Ninziah ta train casi tur dia.
