Diaranson mainta, e chauffeurnan di e entidad di transporte publico, Arubus, un biaha mas a tene un walkout y e biaha aki a yega te Bestuurskantoor.
Segun e chauffeurnan, mirando cu nan no ta haya oido, ni di directiva ni di e mandatario encarga cu e cartera di Transporte, Minister Ursell Arends, nan a dicidi di bin n’e sede di gobierno.
Na Bestuurskantoor por a nota tambe presencia di Secretario General di SEPPA, Magaly Brito como tambe shopsteward di Arubus, Roque Tromp.
E welga di e chauffeurnan ta pasobra cu nan ta exigi un miho structura salarial y no kier tende cu “no tin placa.” Esaki a conduci na e di dos walkout den menos di un siman.
Door di e welga, transporte publico ta plat te ora cu e chauffeurnan reanuda nan trabou. E walkout ta programa for di 6:30am te cu 10:30am, es decir pa 4 ora.
E chauffeurnan lo keda na Bestuurskantoor te ora cu nan entrega e carta (manifiesto) na Minister Ursell Arends, cu ta encarga cu e cartera di Transporte y cu segun informenan lo ta den careda di 9:30am.
