Tin un investigacion grandi andando riba autonan cu ta envolvi den pustamento na Barcadera. Polisnan motorisa encarga cu investigacion ta buscando manera pa pone un fin na e fenomeno di pustamento ilegal riba caminda di Barcadera.
Castigabel y sosteni pa ordo di fiscal ta e echo aki, na momento cu nan gara chauffeurnan den e acto di pustamento ilegal y den forma clandestino. Ordo pa confisca auto mesora ta na vigor y ta netamente local a tuma luga den fin di siman.
Dos auto den pustamento clandestino mester a keda confisca na momento cu polis a observa e pustamento tuma luga. Polis a para e vehiculonan aki y a confisca esakinan. Mientras cu tabata warda riba takelwagen un di e manehadonan aki a bula den su auto y huy bandona e sitio.
Locual cu el a haci, di bandona sitio, ta un acto castigabel pa ley cu castigo te cu 4 aña di prison. E persona aki ta un hende cu polis conoce. Na sitio mientrastanto a takel e otro vehiculo cu si a keda para. E auto cu tin un buskeda riba dje ta un Daihatsu Coure shinishi scur.
Un persecucion a cuminsa, un buskeda te na e persona aki su cas durante oranan di anochi pero na final a presenta na pia di trabou ( un hardware store situa na Watty Vos Blvd.) caminda e persona aki ta labora y sigui na detene.
Durante dia e accion a continua, na un adres na Sero Preto San Nicolas caminda cu un tip a drenta di cu e vehiculo lo ta scondi eynan. A haci un buskeda pero a resulta cu e vehiculo no ta na e sitio ey. Mesora a aclarea na e habitantenan di dicho adres na Sero Preto, cu si acaso bin resulta despues cu e vehiculo ta scondi eynan, nan tambe tin chens di bay cera. A mustranan riba tur e consecuencianan cu ta implica e echo aki.
Ta consehabel na cualkier persona cu tin indicacion di unda e auto aki ta encontra, pa bin dilanti y duna informacion, mas ainda si ta trata di hende cu lo tin e vehiculo aki scondi pa bin dilanti y asina ey evita cualkier cualkier problema cu husticia.
